Marathi Kavita : मराठी कविता

आनंदाचे हे क्षण घेउनी,
भरते ओंझळ सजलेली !
आहेर करते सोन पावलांचा
दारी तुझ्या नटलेली !

मनस्वी ही नाजूक परी,
नांदो सुखाने तुमच्या घरी !
आहेर करते सुखद क्षणांचा
आहे जबाबदारी तुझ्यावरी !

नव्या बंधनाची बांधुनी गाठ,
चालुनी येई ती तुझीच वाट !
आहेर करते सात जन्मांचा
तुमच्या संसारासाठी फिरवुनी पाठ !

राहिले अजून काही माझ्यापाशी,
भरते ओटी तिच्याच कुशी !
आहेर करते अर्धांगिनीचा
मनात कोरूनी तुझ्याचपाशी !

उरले काही माझ्याकडून,
स्वप्न तुमचे सावरायचे !
आहेर करते हा जीवतोडून
असेच हे नाते आवरायचे !

सर्वे काही देऊनी तुला,
रिकामी करते ओंझळ माझी !
तुझीच नवरी, माझ्याकडून
"भेटवस्तू" तुझ्या लग्नाची !

वैशाली......