मला भेटली भारतमाता

[Vinod Thorat]

मला भेटली भारतमाता

स्वातंत्र्याच्या पूर्वसंध्येला लालकिल्ल्यावर भेटली मला भारतमाता
पाणावल्या डोळ्यांनी सांगू लागली तिची व्यथा
मूळची शुभ्र वस्त्र बघ आता कशी झालीयेत जीर्ण
निष्पाप जीवांच्या रक्ताचे शिंतोडे करतायेत मला विदीर्ण

69 वर्षांपूर्वी बेड्यातून मुक्त झाल्याचा आनंद साजरा केलात तुम्ही
पण बेड्या सुटल्याच नव्हत्या कधी
फक्त कुलूपं बदलली
इंग्रजी कुलूपं जाऊन आली देशी बनावटीची
बेड्या मात्र अजून आहेत तशाच

अतिरेक्यांच्या गोळ्यांनी पडलेली छिद्र आता झाकताही येत नाहीत
पण गोळ्यांचे आवाज भ्रष्ट राजकारण्यांना ऐकूही आले नाहीत कधी
अन् कदाचित ऐकूही येणार नाही
कारण गेंड्याची कातडी पांघरलेल्यांना सत्तेशिवाय दुसरं काही सुचत नाही

कधी खैरलांजी कधी खर्डा तर कधी दादरी
निष्पापांचे जीव जातच आहेत
धर्म अन् जातींच्या निर्जीव भिंतीखाली
दिवसेंदिवस भिंती कोसळण्याच्या ऐवजी मजबूतच होतायेत

नेहमीच धुमासतोय काश्मीर अन् उफाळतोय नक्षलवाद
कधी तामिळी बंड तर कधी बोडोंचा उन्माद
कधी गुजरात तर कधी हरियाणा पेटतोय आरक्षणाच्या प्रश्नावर
माझीच लेकरं उठलीयेत माझ्या लेकरांच्या जीवावर

कधी दिल्ली कधी मुंबई तर कधी कोपर्डी
तोडले जातायेत लचके निरागस निर्भयाचे
नाकारला जातोय प्रवेश तिला मंदिरात अन् दर्ग्यातही
निघातायेत फतवे बुरख्यामागे तिचा आवाज टाकायला चिरडून

इथे राजकारणीच ठरवतायेत
कोण देशभक्त कोण देशद्रोही
कोणी काय खाव कुठे जावं
कोणी राहावं या देशात
कसं जगावं अन् कसं मरावही

एवढं बोलून गप्प झाली ती
ढकलून मला विचारांच्या खोल डोहात
अन् मी, महान भारतमातेचा एक क्षुद्र सुपुत्र
गढलोय याच विचारात
स्वराज्य मिळालं, सुराज्य कधी येणार?

- विनोद थोरात, जुन्नर
मोबा. 8983448219

[Ashok_rokade24]

फार छान !