निवडणूक आली वाटतं....

[Rajesh khakre]

निवडणूक आली वाटतं

लगबग सुरु झाली
गाडी गावाकडे फिरली
खादी अंगावर चढली
निवडणूक आली वाटतं

नेत्याची धावपळ वाढली
कार्यकर्त्यांची गर्दी झाली
मतदारांची पर्वा वाढली
निवडणूक आली वाटतं

विकासाची चर्चा झाली
समस्यांची यादी झाली
आश्वासने वाटली गेली
निवडणूक आली वाटतं

घरोघरी भेटी वाढल्या
पायावरती माना पडल्या
पारांवरती गप्पा रंगल्या
निवडणूक आली वाटतं

हॉटेलं बुक झाली
भुकेची सोय झाली
बाटली रिकामी झाली
निवडणूक आली वाटतं

पाच वर्षांची ही दिवाळी
गरीब-हिताची आरोळी
नेता लोटांगण घेई
निवडणूक आली वाटतं
©  राजेश खाकरे
Mo.7875438494
rajesh.khakre@gmail.com