"रौद्र"

[dhundravi]

उतरती संध्याकाळ
वातावरण ढगाळ
एक चिमुकला बाळ
      ........खेळे अंगणात

वारा सुटला जोरात
आई बोलावे घरात
पाणी साठले ढगात
      ........होणार बरसात

उठले वीजेचे तरंग
सारे पावसाचे रंग
बाळ खेळण्यात दंग
      .......आपल्या नादात

आली वीजेला लहर
केला उगीच कहर
कडाडली बाळावर
      ........बाळाचा थरकाप

आईच्या कुशीत घुसून
बाळ रडे हमसून
वीज कडाडे हसून
      ........माज भलताच

आई पसरे पदर
बाई थांबव कहर
कर मायेची कदर
      ........ बाळ पदरात

वीज माजाच्या भरात
म्हणे उन्मत्त स्वरात
घेशी बाळा पदरात
      ........ तू काय कामाची ?

माझ्या येइल मनात
तुझ्या शिरेन घरात
राख होइल क्षणात
      .........तुझ्या बाळाची

वीज बोलता अभद्र
जागे मायेताला रौद्र
पेटे वणवा सर्वत्र
      ........मायेचा हा राग

थरथरले आकाश
हदरले अवकाश
तिच्या डोळ्यात विनाश
      ...........नजरेत आग

जळाले सारे मेघ
पड़े धरणीला भेग
वीजेची कोसळली रेघ
      .........झाली राख राख !

धुंद रवी

[santoshi.world]

chhan aahe 

[gaurig]

वीज बोलता अभद्र
जागे मायेताला रौद्र
पेटे वणवा सर्वत्र
      ........मायेचा हा राग

थरथरले आकाश
हदरले अवकाश
तिच्या डोळ्यात विनाश
      ...........नजरेत आग

जळाले सारे मेघ
पड़े धरणीला भेग
वीजेची कोसळली रेघ
      .........झाली राख राख !
Khupach chan....

[ratish]

yala mhanatat khari kavita
ekach shabd ahe APRATIM

[amoul]

sollid kavita aahe yar!! mastach!!!