जागता जागता

[शिवाजी सांगळे]

जागता जागता

वाटेत भेटले कुणी अचानक चालता चालता
घेतल्या आणाभाका मैत्रीच्या बोलता बोलता

सांगितले गेले गुपित मनीचे,सारे खाजगीतले
करूनी कित्येक प्रयत्न त्यांस टाळता टाळता

का रंगली चर्चा दोघात एवढी...काही कळेना
कोमेजला गजरा मोगऱ्याचा माळता माळता

बातचीत अन् झडल्या चर्चा,रात्रभर दोघांच्या
एकट्यात तेवणारा दीपस्तंभ विझता विझता

किमया अशी काय झाली त्या रात्र मैफलीची
रेंगाळले गोड स्वप्न, स्वप्नातून जागता जागता


©शिवाजी सांगळे 🦋papillon
संपर्क: +९१ ९५४५९७६५८९