आज कुठे मी हरविलो आहे...
वास्तवात असूनही आज
मन स्वप्नं गुंफित आहे,
न जाणे वेड्या मनासवे
न जाणे आज मी कुठे हरविलो आहे...
शब्दांचा अर्थ शोधतांना
शब्दच आज विरत आहे,
बेलगाम मनाला आवरता
न जाणे आज मी कुठे हरविलो आहे...
ग्रीष्मातल्या प्रहरी
आज मेघ बरसत आहे,
मन चिंब भिजले असतांना
न जाणे आज मी कुठे हरविलो आहे...
आज वाटाड्या वाटेला
वाट दाखवीत आहे,
मनाला मार्ग दाखवीतांना
न जाणे आज मी कुठे हरविलो आहे...
उत्तरालाही आज प्रश्नांनी
ग्रासून सोडलं आहे,
मनाचे प्रश्नचिन्ह सोडवितांना
न जाणे आज मी कुठे हरविलो आहे...
मेघाचा पहिला पाऊस
धरणीची तहान भागवित आहे,
मनाची तहान शमावितांना
न जाणे आज मी कुठे हरविलो आहे...
दिशाही तूच,ध्यासही तूच माझ्या
प्रत्येक शब्दात तुझेच अस्तित्व आहे,
कदाचित तुलाही असच वाटत असेल
" न जाणे आज मी कुठे हरविलो आहे..."
: अविनाश सु.शेगोकार
०२-१०-२०११
