एक होती ठम्माबाई
एक होती ठम्माबाई
तिला सोशल वर्कची घाई
रात्रंदिवस हिंडत राही
पण वर्कच कुठे उरले नाही
वर्क थोडे बाया फार
प्रत्येकीच्या घरची कार
नोकर - शोफर - बेरा - कुक
घरात आंबून चालले सुख
घराबाहेर दुःख फार
करीन म्हणते हलका भार
कार घेऊन निघते रोज
हरेक दुःखावरती डोज -
पाजीन म्हणतेः पिणार कोण ?
सगळ्या जणींना करते फोन
‘‘ मला कराल का हो मेंबर ?’’
‘‘ अय्या , सॉरी , राँग नंबर !’’
‘‘ सगळ्या मेल्या मारतात बंडल ’’
म्हणून स्वतःच काढते ‘ मंडळ ’!
आया होऊन येतात इथे
त्यांच्या मागून मागून फिरतात
त्यांच्या तारुण्याची भुते
टिळकांचाहि पुतळा आता
सारे काही पाहून थकला
मर्सीडिजचा तारा म्हणतो
बळवंतराव होरा चुकला
