पोस्टमार्टेन रिपोर्ट.. (The cause of death is cast)

[विक्रांत]

उद्या परवा सीलबंद त्याचा 
पोस्टमार्टेम रिपोर्ट येईल
खरा असेल कदाचित खोटा नसेल   
पुरा असेल बहुदा अपुरा नसेल
करणाऱ्याच्या मनावरील
ओझ्याखाली दबला नसेल
आणल्या पुसल्या पुराव्याने
उलटा सुलटा झाला नसेल
वैद्यकीय भाषेत शास्त्रशुद्ध
जसा कि ...
अतिरिक्त रक्तस्त्रावाने..
अथवा गुदमरून गेल्याने ..
वा व्हिसेरा तपासनीस 
रिपोर्ट लवकरच कळेल.. 
वगैरे ..वगैरे.. परंतु
काहीही असला तरी
कधीही आला तरी
तो रिपोर्ट ..
खरा कधीच नसेल
कारण त्याच्या मृत्यूचे कारण
कुठलेही सर्टिफिकेट 
कुठलाही रिपोर्ट 
कधीच दाखवणार नाही
त्यांना मुळी दाखवताच येणार नाही
कारण ते असेल " जात "
(The cause of death to the best of my knowledge and belief is cast )

विक्रांत प्रभाकर