अश्रुविन हातात न राहिले काही

[विक्रांत]

अश्रुविन हातात न राहिले काही
आक्रंदन मनात या भरुनिया राही

घोड्यावरी बसुनी तो मंडपी आला
सजुनी पैठणीत ती खांद्यावरी शेला
सनईसवे मंगलाष्टक नाद नभी मिनला
कोपऱ्यात दूर मी विवश सारे पाही


अश्रुविन हातात न राहिले काही
आक्रंदन मनात या भरुनिया राही


उधळल्या अक्षता वाजंत्री वाजली
तयाच्या जीवनाची वाट सुरु झाली
जाहली बिदाई गाडी निघून गेली
प्रीत माझी भग्न उरात मी वाही

अश्रुविन हातात न राहिले काही
आक्रंदन मनात या भरुनिया राही

विक्रांत प्रभाकर