ज्ञानेशाचा ओंकार तू

[विक्रांत]

निराकारातून उमटला           
करुणामय आकार तू           
मिती जन्मदाता प्रश्न           
विश्वसंकल्पा आधार तू
महास्फोटाआधी दाटली
अनाकलनीय उर्जा तू
नेणिवेचा अथांग सागर
नि जाणीवेचा गर्भ तू
ज्ञानाची सीमा मानूनही
चक्रावणारा अनंत तू 
विज्ञानाची घुसळण इवली
सदा सर्वदा अस्पर्श तू
थकली बुद्धी ठकला विचार
इतुका अगणित अपार तू
माझ्या मनी सजविलेला
ज्ञानेशाचा ओंकार तू

विक्रांत प्रभाकर
http://kavitesathikavita.blogspot.in/