शोध सुखाचा

[गणेश खराटे]

उषानिशांत दिशादिशांत, शोधित तुज होतो
शोधिता शोधिता तुज, मी मज हरवित होतो
कोपलेल्या रविसंगे, तापलेल्या वाळवंटी
पोळलेल्या पावलांना, अश्रूंनी मी भिजवीत होतो

गुलाब हा, हा मोगरा, ही जाईजुई, शेवंती ती
पुष्पमाला कंठी घालिता, तो कंटकहार होतो
ही मुलायम, ही रेशमी, मृदू पुष्पशय्या ही
शय्येवरती तनु झोकिता, तो विखारी अंगार होतो

मिलनी तुज प्रितीने, न्हाऊन मी निघालो होतो
अवचित ऐकला तुझा 'शेरा', मी 'भांडखोर'' होतो
हा माझा, तो माझा, कवटाळित सकलांना होता
हाय रे दैवा! माझ्या घरात, मीच चोर होतो

मिळाले मिळाले, मज सुख हे मिळाले म्हणता
उचलुनि घेतो निजकरी, तो सुखाचा भास होतो
सद्गुणी, परोपकारी, थोर, जो स्वानंदे जगतो
एके दिनी परी अचानक, तो काळाचा घास होतो

                                  गणेश खराटे
                                      मलकापूर
                               (जि. बुलडाणा)
                              ९९२२१४९४०६
                              ७०२८३६७२११
            gnkharate@gmail.com