माझ्या येण्याने गं

[dhanaji]

माझ्या येण्याने गं .. खुलते फुलते
मला झुलवते.. माहेर गं


दारी वाट बघे.. माझी वेडी आई
जन्माची पुण्याई, तिची कूस!


बाबाच्या मनाची, घालमेल दिसे ,
मनाला गं पिसे .. त्याच्या लागे


लाडाची गं लेक.. पाहुणीच झाली..
चार दिस आली.. झुरवाया


अंगण विचारी, ख्याली नि खुशाली ..
म्हणे आता आली, माझी सखी


नाचर्या पायाने , धावे किती मन ..
साठवावे क्षण , हृदयात


मन कालवड .. मायेच्या पंखात ,
शंख शिंपल्यात मोती जणू


भरुनिया घ्यावा , माहेराचा गंध, ..
एक एक स्पंद मोहरावा


माहेराचे वेड, कुणाला कळावे..
पाऊल पडावे.. अंतराळी


निघता निघेना, जडावले पाय..
काजळाची साय.. पापण्यात


लावूनिया भाळी, माहेरची माती..
पाळू जनरीती .. दुनियेची

By Prajakta Patwardhan