प्रेमाचा अर्थ

[niteshk]

प्रेम नाही धगधगते निखारे
आतल्याआत धूमसून विझवायचं नसतं
प्रेम म्हणजे कृष्णाची वेणू
मधुर स्वरांमधे स्वत्व हरवायचं असतं

प्रेम नसते रोरावतं वादळ
सगळं संपवून सोडायचं नसतं
प्रेम असते वाऱ्याची झुळूक
मंद मंद सुखद् वहायचं असतं

प्रेम नसते पायातली बेडी
जोखड बनून अडवायचं नसतं
प्रेम असतं नाजुक फुलपाखरू
कोषाचे बंध झुगारून उडायचं असतं

प्रेम म्हणजे नाही प्रखर सूर्य
दाहकतेने होरपळून जायचं नसतं
प्रेम म्हणजे डवरलेलं वटवृक्ष
ऊन झेलून सावली देत रहायचं असतं

प्रेम काही ज्वालामुखी नाही
एका उद्रेकाने संपवायचं नसतं
प्रेम म्हणजे सुगंधी चाफा
संपूनही धुंद दरवळायचं असतं

स्वलिखित