अस्तित्व

[meenakshi mali]

नावातच माझ्या
मी नकोशी
सहवास माझा
कुणा नको
जन्मतःच मी
दवाखान्याकडे येणारी
बापाची पावलं
माघारी फिरली
मुलगी म्हणून
गुन्हा काय माझा ?
वयात येताच
किळसवाण्या  नजरा
माझ्याच सभोवताली
मोकळा श्वास घ्यायला
फुरसतही नाही मिळाली
आईही साथ सोडून गेली
तोवर सौभाग्य आलं
नातं नावापुरतंच उरलं
नावातच माझ्या मी नकोशी
पिलूही तोवर पदरात पडलं
पिलापुरतं जगणं माझं उरलं
तोवर काळानं घात केला
मायेनं विणलेलं घरटं पुन्हा तुटलं
नकोच असलेली माझीच
सावलीही उन्मळून पडली
गुन्हा मी काय केला ?
मुलगी म्हणून
बहीण म्हणून
पत्नी म्हणून
आई म्हणून
नकोयत आता कुणा
माझ्या अस्तित्वाच्या खुणा
मुलगी म्हणून
सांगा खरच
गुन्हाय का माझा ?
की जगणं हाच  गुन्हाय  माझा ?

-Meenakshi