पाऊसचोर

[Asu@16]

                पाऊसचोर

टाहो फोडितो शेतकरी राजा
कुणी चोरला पाऊस माझा

      पुढारी पेंढारी, बिल्डर चालू !
      जमुनी सगळे कौरव भाऊ
      फेडती सृष्टीचा हिरवा शालू
      धृतराष्ट्र सदा जगी आंधारी
      सगळे जन झाले गांधारी
      आंधळी प्रजा, आंधळा राजा

टाहो फोडितो शेतकरी राजा
कुणी चोरला पाऊस माझा

      वड पिंपळ ना दिसे दूरवर
      आटल्या नद्या, आटले सरोवर
      दसरा, दिवाळी, वटसावित्री
      मिळुनि करती उजाड धरित्री
      बोडके डोंगर मागती भिक्षा
      कृतघ्न मानवा जगवी वृक्षा

टाहो फोडितो शेतकरी राजा
कुणी चोरला पाऊस माझा

      विकासाच्या गप्पा कुठवर
      योजनांच्या फाईली ढीगभर
      हंसती किती ? केवळ मूठभर
      नको प्रगतीचे गीत गाऊस
      येतो पाऊस, जातो पाऊस
      कुणी ना अडवी पाऊस राजा

टाहो फोडितो शेतकरी राजा
कुणी चोरला पाऊस माझा

      नेता बोले जनता डोले
      सर्वभक्षी हे चोर साले
      बोले तैसा न चाले
      त्याची निंदावी पाऊले
      दिवस सुगीचे दिसती भले !
      शेतकर्‍याचे डोळे ओले

टाहो फोडितो शेतकरी राजा
कुणी चोरला पाऊस माझा

- अरुण पाटील