विठ्ठला !

[Asu@16]

                विठ्ठला !

नाही पावसाच्या धारा,
कसा येऊ पंढरपुरा
              माय माझी तहानली
              दोन थेंबांना आसुसली
              ढग घाली येरझारा
              अन् सोसाट्याचा वारा
नाही पावसाच्या धारा,
कसा येऊ पंढरपुरा
              दु:ख गोठले मनात
              त्राण नुरले तनात
              जीव झाला सैरावैरा
              कुठे मिळेना सहारा
नाही पावसाच्या धारा,
कसा येऊ पंढरपुरा
              रडे वसुधेचा कान्हा
              तुज फुटे ना रे पान्हा
              कर्जी बुडालो पुरा
              आता फासाचा सहारा
नाही पावसाच्या धारा,
कसा येऊ पंढरपुरा
              एक मागणे विठ्ठला
              कर कटीचे उचला
              वीट पायीची सारा
              अन् हाती नांगर धरा
नाही पावसाच्या धारा,
कसा येऊ पंढरपुरा

- अरुण सु. पाटील
 
https://www.facebook.com/AsuChyaKavita