ओंजळ

[vijaya kelkar]

              ओंजळ
   रविकिरणांनी प्राची प्रांत लाल झाला
   ओंजळीने अर्घ्य देती ऋषी सूर्याला
   दारी पारिजातक पानोपान बहरला
   ओंजळी भरभरून फुले अर्पूया शंभूला
   सुवासिनी प्रदक्षिणा घालती तुळशीला
   ओंजळीने ओटी मागती सौभाग्याला
   माध्यान्ही उभा रस्त्याच्या कडेला तहानेला
   ओंजळीने पाणी पिऊन तृप्त करी आत्म्याला
   अन्नधान्याने कोठारे नुसतीच नकोत भरायला
   सुरुवात करा ओंजळी ओंजळीने लुटवायला
   जैन दिगंबर मुनीही चालती रस्त्याला
   थांबतील, भक्षण करण्या ओंजळीतल्या अन्नाला
   सांजवात करून करू लक्ष्मी पूजनाला
   ओंजळीने वाहू साळीच्या लाहीला
   ओंजळ ही देता तुजवीण कोणासमोर नको पसरायला
   ओंजळ ही बंद केली तुझ्यासमोर नमायला .....

                           विजया केळकर_______
--