कविता

[पल्लवी कुंभार]

पुस्तकांच्या सागरात
दडली एक कविता
लाटेहून तरल
विहारे स्वच्छंद कविता
घेते रौद्र रूप
असंतोषी कविता
घाली साद आसमंतात
पावसाळी कविता
गुंतली भावनांत
माहेरवाशी कविता
लागे ओढ परमेशाची
भक्तिमय कविता
एकटेपणाला सोबत
विरह कविता
साजिऱ्या रूपावर घडते
शृंगारिक कविता
दिल्या वचनांना जागते
तीरावरली कविता
होता आभास तिचा
घडते ती कविता
तोडता रेशीमबंध
डोळ्यात वाचते कविता
वात्रट फुशारकीस
खेचते खाली वात्रटिका
येते उधाण अंतरी
वाचता प्रेरणादायी कविता
हसून वेडी लोळवते
विनोदी कविता
लागून विषयाला विस्तारते
गंभीर अशी कविता
बडबड गीतात खेळते
लहानशी कविता
शांततेला वाचा फोडते
कधी एक कविता
रंगात रंगते सणांच्या
देखणी कविता
कागदावर उमटते
मनातली कविता
शब्दांच्या अस्तित्वात
रुजते कविता

~~ पल्लवी कुंभार ~~