अस्थी

[Asu@16]

         अस्थी

पिल्लू उडाले आकाशी
माय राहिली घरट्याशी
वाट पाहते रात्रंदिवशी
पिल्लू गेले परदेशी
         झाडावर बांधून झुला
         बसविला बाळकृष्ण सावळा
         चिवचिव परि येता अंगणी
         आठवणीत रे तुझ्या रंगली
दिवस गेले, वर्षे गेली
पिल्ला भेटण्या आस लागली
जर्जर झाली माय माऊली
वाट पाहुनि गात्रे थकली
         बाळा, बाळा, आई रडली
         अन्न त्यागले, धाप लागली
         प्राण उडाले, कुडी राहिली
         वाऱ्याने मग फुले वाहिली
अजुनि रिकामे घरटे डोले
हलता, डुलता, वाऱ्या बोले,
अस्थी उचलण्या लवकर येरे
बाळा मजला जवळ घेरे

- अरूण सु.पाटील
 
https://www.facebook.com/AsuChyaKavita