युगांची बंधने

[jayshree jadhav-mali]

युगांची बंधने सारी तशीही पाळते आहे
नव्याने कुंपणे काही स्वतःला घालते आहे

प्रसंगी भांडते थोडी कधी माघार घेते मी
हवे ते घेउनी बाकी नको ते टाळते आहे

नको वाटेवरी पेरू पुन्हा काटे सराटे तू
ठणकती पावले माझी जपूनी टाकते आहे

कुणाशी वैर ना माझे कुणाशी वाद ना माझा
कधी वैताग आला तर स्वतःशी भांडते आहे

तुझ्या छायेत आले नी स्वतःला पारखी झाले
हरवले नेमकी कोठे कधीची शोधते आहे
     
                              जयश्री जाधव