सोबतीला तू हवा

[jayshree jadhav-mali]

सोबतीला तू हवा

पावसाने छेडताना सोबतीला तू हवा
थेंब ओले झेलताना सोबतीला तू हवा

मागते मी फार कोठे?हात दे हाती तुझा
बिकट वाटा चालताना सोबतीला तू हवा

संकटांचा भार सारा एकटीने पेलते
पण सुखांना तोलताना सोबतीला तू हवा

दुःख सारे लपवतो हा चेहरा हसरा जरी
आसवांना ढाळताना सोबतीला तू हवा

पावलांनी पाळल्या कुरपांत या जखमा जुन्या
त्या नव्याने खोलताना सोबतीला तू हवा

आठवांवर चालती जे रोज तू नसला तरी
श्वास वेडे थांबताना सोबतीला तू हवा

                     जयश्री जाधव