वसंत गाणे

[शिवाजी सांगळे]

वसंत गाणे

सावलीचे हळूच झाडासमीप येणे
छेडतोय वसंत असे उन्हाचे गाणे...!

कवडशांचे लाजऱ्या या गर्द तरूतळी
फांदी आडून गुपचूप ते डोकावणे..!

नृत्य कोमल गुलाबी या नव पालवीचे
सुचवितसे तृणपात्याला सुरेल तराणे !

गुणगुण करीत हळूवार वाऱ्या संगती
नभांचे उगाच काठावरी रेंगाळणे...!

करूनी हितगूज न् कुजबुज तीरासंगे
धावत येऊन लाटांचे मागे फिरणे...!

© शिवाजी सांगळे 🎭
संपर्क:९५४५९७६५८९