आठवणीतला पाऊस....

[Mahesh Thite]

            आठवणीतला पाऊस

पहिल्यांदाच येणारा,
जमिनीच्या भेगांना मलम लावणारा,
मातीतून गंध पसरवणारा,
         .....आठवणीतला पाऊस।।

रिमझिम बरसणारा,
चिंब भिजवणारा,
वय विसरून बागडायला लावणारा,
          .....आठवणीतला पाऊस।।

मेघागर्जेनेसह येणारा,
मुसळधार कोसळणारा,
मनामध्ये धडकी भरवणारा,
         .....आठवणीतला पाऊस।।

श्रावणात येणारा,
चार दिवस मुक्काम ठोकणारा,
शाळेला दांडी मारायला कारण देणारा,
          .....आठवणीतला पाऊस।।


डबके साचवणारा,
कागदी होड्यांना टायटॅनिक बनवणारा,
मोरांसोबत रानात नाचणारा,
         .....आठवणीतला पाऊस।।

डोंगरावर ढगांसह पहुडणारा,
खळखळ झऱ्यांचे संगीत देणारा,
काळ्या खडकात रंग भरणारा,
          .....आठवणीतला पाऊस।।

सप्तरंगी इंद्रधनुष्य पेलणारा,
धनुष्यदोरीसम टणत्कार करणारा,
बाणांसम पाऊसधारा वर्षवणारा,
          .....आठवणीतला पाऊस।।

                       -- महेश थिटे ,
                           अहमदनगर