स्वप्न रंगीत झाले

[sachinikam]

स्वप्न रंगीत झाले

स्वप्न रंगीत झाले, तुजला बघता
श्वास गंधीत झाले, जवळी येता

ती चांदणी नभी, हळुवार बोलली
माग जे हवे, देईन निखळुनी

शब्द संगीत झाले, कविता लिहिता
सूर जुळून आले, साथ तू देता

डोळे मिटुनी तू, घे जवळी मला
जीवात गुंतुदे, वेड्या जीवाला

मेघ बरसुनी आले, तुजसवे चालता
अंग शहारुनी गेले, जवळी घेता

हा स्पर्श मखमली, उबदार मलमली
विसरुनी देहभान, मनेही भेटली

क्षण बहरूनी गेले, डोळ्यांत पाहता
मन मोहरूनी गेले, वारा वाहता

ही पैंजणे तुझी, सुमधुर वाजली
ओळखीच्या खुणा, काळजात गाजली

दीप पाजळू लागले, प्रेमात पडता
रूप उजळू लागले, नजरा भिडता

हा सागरी किनारा, हळुवार बोलला
माग जे हवे, देईन मी तुला.
-------------------------------------------
गीतकार: सचिन निकम.
कवितासंग्रह: मुरादमन
sachinikam@gmail.com
-------------------------------------------