पुष्प२रे- गूढ

[Shilpa Mohite]

पुष्प२रे-               गूढ

हे विधात्या!
             सृष्टीची निर्मिती लगे मज गूढ
             रंगीबेरंगी बहर निसर्गाचा
             इंद्रधनूच्या सप्त रंगाचा
             डोंगरमाथ्यावरी उगम सरितेचा
             अचंबा कल्पवृक्षावरील जलाचा
             आकाशीच्या चंद्रतारकांचा
             प्रकाशणाऱ्या तेजोमय रविचा
             सृष्टीच्या नवनिर्मिती ची
             अखंड परंपरा ही रूढ
             सृष्टीची निर्मिती लगे मज गूढ।
हे विधात्या!
              तूच निर्मिशी असंख्य जीवचर
              तूच धरीशी मायेची पाखर
              परी प्रचंड होता भार भूवरी
              भूकंप, प्रलय आणि महामारी
              असा प्रचंड होई उत्पात
              असंख्य जीवांचा घातपात
              निसर्गाचा समतोल राखता
              अंतःकरण होई जड
              सृष्टीची निर्मिती लगे मज गूढ।
     
                              _शिल्पा मोहिते