जीवन हे एक कोडं

[Shubhangi Gaikwad]

कोणास वाटे जीवन जणू खळखळ वाहणारा निर्झरा
तर कोणास भासे जीवन खवळलेली नदी ब्रह्मपूत्रा

कोणास वाटे जीवन हे फळाफुलांनी बहरलेला डोंगर
तर कोणास भासे जीवन बर्फाच्छादित एव्हरेस्ट शिखर

कोणास वाटे जीवन जणू मंद प्रकाश देणारा दिवा
तर कोणास भासे जीवन उसळत्या आगीचा वणवा

कोणास वाटे जीवन जणू वाट मऊ मखमली गालीचा
तर कोणास भासे जीवन वाटेतले खळगे आणी काचा

कोणास वाटे जीवन जणू श्रावणाच्या रिमझिम सरी वर सरी
तर कोणास भासे जीवन अतिवृष्टी फाडूनी आभाळ वरी

कोणास वाटे जीवन जणू बासरीतले सूर मधुर
तर कोणास भासे जीवन ढगांचा गडगडाट भयंकर

कोणास वाटे जीवन जणू वार्याची झूळूक छान
तर कोणास भासे जीवन  वादळी वारा तो बेभान

कोणास वाटे जीवन जणू  स्वच्छंदी भिरभिरती पाखरे
तर कोणास भासे जीवन पिंजर्यातला जीव तो गुदमरे

कोणास वाटे जीवन जणु मधूरसाने तृप्त झालेली कोकीळा
तर कोणास भासे जीवन तहानेन व्याकुळ झालेला कावळा

जीवन हे सागर, सुखदुःखाच्या लाटा येतात आणि विरतात
किनारा गाठण्याच्या लाटांच्या  धडपडीला जगणं म्हणतात

कधी जीवन हा समुद्र त्यात ना सुखदुःखाच्या लाटा ना तरंग
सारं काही निःस्तब्ध अचेतन, शून्यात हरवलेलं जगणं  बेरंग

असू दे जीवन कोडं किती ही गहन आणि  कठीणं
स्विकारा आव्हान जा सामोरे तेच खर्या अर्थाने आहे जगणं

नको भरकटू नको घालू वेळ वाया सोडविण्या जीवन कोडे
सुटेल कोडे, टाक तू आत्मविश्वासाने प्रत्येक पाऊल पुढे पुढे


शुभांगी सुभाष
shubhgaik@gmail.com