दे जीवनाला आकार

[Shilpa Mohite]

पुष्प १० वे
            दे जीवनाला आकार

निर्गुण निराकार
दे जीवनाला आकार
बघ निसर्गाचा रुद्रावतार
राहिले ना घरदार
पडला उघड्यावर संसार
ना उरला कोणाचा आधार
          होत्याचे नव्हते झाले
          सुख ओंजळीतूनच निसटले
          जीव जगविण्यासाठी
          होऊ किती लाचार
कितीदा पडायचे
आणि कितीदा उठायचे
या धडपडीतच वाटते
सारे आयुष्य संपणार
           स्वप्न सारी भंगली
           उमेद सारी संपली
           तरीही जगण्याची
           जीद्द नाही सोडणार
तूच आहेस आशेचा किरण
तूच करीशी उदरभरण
मार्गी लाव आमुचे जीवन
हो आमुचा तारणहार

         -शिल्पा मोहिते