ध्येय

[Shubhangi Gaikwad]

ध्येय

आत्म्यविश्वासाचे पंख लावूनी घेऊ दे भरारी सुंदर स्वप्नाला
संकटावर करू मात गाठण्या जिवन शिखरावरल्या ध्येयाला

शंकाकुशंकाचे वारे घोंगावती वाट अडविण्या स्वप्नाची
निराशेचे काळेकुट्ट मेघ टाकती अंधारूनी वाट तयाची
आता हार मानणे नाही ठणकावूनी सांग तुझ्यातल्या धैर्याला
संकटावर करू मात गाठण्या जिवन शिखरावरल्या ध्येयाला

वर्तमान काळाची जिद्द, देई पंखास बळ घेण्यास उंच भरारी
भुतकाळाचा अनुभव देई दिशा दाखवूनी, ठेवुनी नजर करारी
भविष्यकाळ वाट पाही आतुरतेने कवटाळण्या यशाला
संकटावर करू मात गाठण्या जिवन शिखरावरल्या ध्येयाला

शिवरायांनी स्वप्न ऊरीचे साकारले स्थापुनी हिंदवीस्वराज्य
हुतात्म्यांचे बलिदान गेले न वाया लाभले भारतास स्वातंत्र्य
रक्तातली सळसळती स्वप्नाची जिद्द पाहूनी काळ ही गहिवरला
संकटावर करू मात गाठण्या जिवन शिखरावरल्या ध्येयाला

शुभांगी सुभाष गायकवाड
shubhgaik@gmail.com