चारोळ्या पावसाच्या - भाग -६

[Atul Kaviraje]

                     चारोळ्या  पावसाच्या - भाग -६ 
                     --------------------------

पाउस व दंव-बिंदू
---------------
दंव-बिंदू दिमाखात डोलत होते
पाना-फुलांना डोलवित होते
पर्जन्य-बिंदूची चाहूल लागता,
त्यांचे स्वागत करीत होते.


पाउस व मृत्तिका
--------------
अमृत-थेंब अंगावरी घेउनी
वाट हि पावन झाली,
मृद-गंधाची सुरभी पसरवून,
माती हि पहा धन्य झाली.

पाउस व धुके
-----------
पहाट झाली, पसरले धुके
दाट-पांढरे, झाले क्षितिजही फिके
परी चाहूल लागता , पर्जन्याची,
विरले पहाता, हलके-हलके.

पाउस व हिरवळ
--------------
हरित तृणांची मखमल पसरली
हिरवीगार जणू शेजच सजली
अमृत-थेंब झेलीत तनुवरी,
हिरवळ हि मोदे डोलू लागली.

पाउस व द्वेष
-----------
पाउस आला जोडीत नाते
करीत जल-कुंभ प्रेमाचे रिते
द्वेष-आकस, सारीत दूर
मनास हर्षाचे देत भरते.


-----श्री अतुल एस परब(अतुल कवीराजे)
-----दिनांक-18.06.2021-शुक्रवार.