मानवी जीवन कवडीमोल ? - गंभीर-वास्तव कविता-"अनमोल जीव, कवडीमोल ठरावा ?"

[Atul Kaviraje]

मित्र/मैत्रिणींनो,

     साल ,1993, या  वर्षी , मुंबईत  जी  बॉम्ब -स्फोटाची  मालिका   अतिरेक्यांनी  घडवून  आणली  होती , त्याच  विषयावर  माझी  ही  कविता  आहे . निरपराध  लोकांचा , सामान्य  जनांचाच  या  घातपातात  नाहक  बळी  गेला  होता . अगदी  सकाळ-पासून  दुपार -पर्यंत  हे  क्रूर  बॉम्ब -स्फोट  हत्याकांड   सुरु  होते . जो  तो  जीव  मुठीत  धरून  पळत  होता . मुंबईतील सारी  इस्पितळे  जखमी  रुग्णांनी , मृत   व्यक्तींनी  अक्षरशः  भरून  गेली  होती.  कुणाला  कुणाचाच  पायपोस  नव्हता . असे  विदीर्ण  चित्र  त्या  दिवशी   दिसत  होते. यमाने  आणि  यमदूतांनी  त्या  दिवशी  थैमानच  घातले  होते .

     मानवी  जीवन  इतके  स्वस्त  असावे  ? मानवी  जीव  इतका  कवडीमोल  ठरावा ? की  असा  नाहक  जावा . काहीही  कारण  नसताना, अपराधी  हे  कृत्य  करून  केव्हाच  पसार  झालेत , आणि  भरावे  लागतेय  ते  या  निरपराध  लोकांना . काय  परिस्थिती  आलीय  देशावर  ? मला  अजूनही  बातमी  नाही , त्यातले  किती  अपराधी  पकडले  गेले , किती  जणांवर  खटला  भरला   गेला , त्यातले किती  जण  सुटले , कितीजण  अजूनही  फरार  आहेत ? मुद्दा  तो  नाही , तर  काहीही  चूक  नसता  या  घातपाती  कृत्याने  तुमच्या  आमच्या  सारख्या  सामान्य  नागरिकांचाच  यात  जीव  गेलाय . याचेच  दुःख  जास्त  आहे .

     ही  परिस्थिती  सुधारेल  का  ? का  हे  असेच  सुरु  राहील ? या  प्रश्नाची  उत्तरे  सरकारनेच  शोधायची  आहेत. तोवर  आपण  कायमचंच  जीव  मुठीत  धरूनच  जगायचे  आहे . असो , बॉम्ब -स्फोटातील  त्या  निरपराध  व्यक्तींना  ही  माझी  मन - दुःख  - कविता  अर्पण  करतो . कवितेचे  शीर्षक  आहे  - "अनमोल जीव, कवडीमोल ठरावा ?"



            ( बॉम्बस्फोटातील निरपराध व्यक्तींना हि कविता अर्पण )
               मानवी जीवन कवडीमोल ? - गंभीर-वास्तव कविता

                       "अनमोल जीव, कवडीमोल ठरावा ?"
               ------------------------------------------


जीवन येथे एकदाच मिळते
अवेळीच जीवाचा शेवट व्हावा
काय त्यांचा दोष नकळे,
अनमोल जीव कवडीमोल ठरावा ?

     पाप कुणाचे, भोगतोय कोण ?
     गुन्हेगार कोण, अपराधी कोण ?
     अपराध करुनिया पुन्हा पुन्हा सुटावा !
     अनमोल जीव कवडीमोल ठरावा ?

माजलीय जिथे-तिथे बंडाळी,अनाचार
करीत सुटलेत देशद्रोही,अमानुषी अत्याचार
कुठाय त्यांचा मागोवा, पुरावा ?
अनमोल जीव कवडीमोल ठरावा ?

     कठीण झालयं जीवन जगणे
     भीषण हत्याकांड घडवताहेत पाहुणे
     थारा देउनी,विश्वासघात करावा,
     अनमोल जीव कवडीमोल ठरावा ?

कुणाचे कोण? कोणासाठी कोण ?
एक ऋणानुबंध असतो,क्षणभराचा
पण दुसऱ्याच क्षणी धागा तुटावा,
अनमोल जीव कवडीमोल ठरावा ?


-----श्री अतुल एस परब(अतुल कवीराजे)
-----दिनांक-24.07.2021-शनिवार.