II जय श्री कृष्ण II-II गोकुळाष्टमीच्या हार्दिक शुभेच्छा II-(कविता - क )

[Atul Kaviraje]

                                II जय श्री कृष्ण II
                        II  गोकुळाष्टमीच्या हार्दिक शुभेच्छा II
                      ------------------------------------
                                    (कविता - क )
                                    --------------

मित्र/मैत्रिणींनो,

     आज 30-ऑगस्ट,२०२१ चा पावन दिवस, म्हणजे श्री कृष्ण जन्माष्टमी (श्रीकृष्ण जयंती, कालाष्टमी, गोकुळाष्टमी) चा पवित्र दिन. मराठी कवितेच्या माझ्या सर्व कवी भावांस, आणि कवयित्री बहिणींस, या गोकुळाष्टमीच्या अनेक हार्दिक शुभेच्छा. ऐकुया काही कविता.


                                   गोकुळाष्टमी
                               (कविता क्रमांक-4)
                               "श्रीकृष्णाची भूपाळी"
                             ----------------------


जाग रे जाग बापा । विश्वपालका कृष्णा ।
दीन आम्ही उभे द्वारी । आमुची बोळवी तृष्णा ॥ ध्रु. ॥

त्रासलो प्रपंची या । बहु कष्टलो भारी ।
म्हणवूनि शरण आलो । विभो तुझिया द्वारी ॥ १ ॥

सांग बा न्यून काय । हरि तुझिया भांडारी ।
याचक भीक मागे । प्रेम दीई झडकरी ॥ २ ॥

गुरुकृपे उदयो झाला । हरि उदया आला ।
सुख ते काय सांगू । जिवलग भेटला ॥ ३ ॥

श्रीगुरुनाथराया । कृपासिंधु गोविंदा ।
देवनाथ प्रार्थिताहे । प्रभुपदारविंदा ॥ ४ ॥


                                    गोकुळाष्टमी
                                (कविता क्रमांक-5)
                              "श्रीकृष्ण जन्म-पाळणा"
                            -----------------------


गोकुळाष्टमी जन्म तो झाला
बाळ श्रीकृष्ण जन्माला आला
देवकी पुत्र आला वंशाला
वासुदेवाला आनंद झाला,
जो बाळा जो जो रे जो ।।१।।

बाळ श्रीकृष्ण वाढू लागला
पाळणा त्याचा हलू लागला
गोकुळनगरी आनंद झाला
सारे गोपी होऊन गोळा,
जो बाळा जो जो रे जो ।।२।।

कंस मामाला प्रश्न तो पडला
मारण्याची भीती त्याच्या जीवाला
सारासार त्याने विचार केला
जीवे मारू आता बाळाला,
जो बाळा जो जो रे जो ।।३।।

वासुदेवाने विचार केला
बाळ श्रीकृष्ण दिला येशोदेला
बाळाचा प्राण त्यांनी वाचवला
कंसाचा काळ वाढू लागला,
जो बाळा जो जो रे जो ।।४।।

मित्रांबरोबर खेळू लागला
लंगड्या, पेंद्या, सुदामा जोडीला
राखितो गायी यमुने काठाला
असा हा बाळ नटखट झाला,
जो बाळा जो जो रे जो ।।५।।

एक, एक गवळणीची अडवून वाट
जातो हट्टाने त्यांच्या पाठोपाठ
हळूच फोडतो त्यांचा हो माठ
दह्यासाठी धरूनी हट्ट,
जो बाळा जो जो रे जो ।।६।।

कंस मामाने केला हो छळ
भयभीत झाले अवघे भूमंडळ
तोच बाळ तो ठरला काळ
कंस मामाचा केला संहार,
जो बाळा जो जो रे जो ।। ७।।


                      (साभार आणि सौजन्य-संदर्भ-स्टोरी मिरर.कॉम)
                    -------------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-30.08.2021-सोमवार.