II जय श्री कृष्ण II-रास क्रीडा-होळी गीत -"आज गोकुळात रंग खेळतो हरी"

[Atul Kaviraje]

                                 II जय श्री कृष्ण II
                        II गोकुळाष्टमीच्या हार्दिक शुभेच्छा II
                      -----------------------------------


मित्र/मैत्रिणींनो,

     आज 31 ऑगस्ट,२०२१ चा पावन दिवस, म्हणजे श्री कृष्ण जन्माष्टमी व गोपाळ काल्याचा पवित्र दिन. मराठी कवितेच्या माझ्या सर्व कवी भावांस, आणि कवयित्री बहिणींस, या गोकुळाष्टमीच्या अनेक हार्दिक शुभेच्छा. आज गोकुळात होळी रंगली आहे. कान्हा साऱ्या गोपिकांसमवेत  राधेलाही रंगाच्या पिचकारीने भिजवून टाकीत आहे. ऐकुया तर या रंगाच्या रंगात रंगलेले एक रास क्रीडायुक्त होळी गीत. या गाण्याचे गीतकार सुरेश भट आहेत, आणि गीताला स्वर दिला आहे लता मंगेशकर यांनी. या होळी गीताचे बोल आहेत- "आज गोकुळात रंग खेळतो हरी"


                                  रास क्रीडा-होळी गीत   
                             "आज गोकुळात रंग खेळतो हरी"
                           ------------------------------
                       

आज गोकुळात रंग खेळतो हरी,
राधिके, जरा जपून जा तुझ्या घरी.

तो चटोर चित्तचोर वाट रोखतो
हात ओढूनी खुशाल रंग टाकतो
रंगवून, रंगूनी गुलाल फासतो
सांगते अजूनही तुला परोपरी,
राधिके, जरा जपून जा तुझ्या घरी.

सांग श्याम सुंदरास काय जाहले
रंग टाकल्याविना कुणा न सोडले
ज्यास त्यास रंग रंग रंग लागले
एकटीच वाचशील काय तू तरी,
राधिके, जरा जपून जा तुझ्या घरी.

त्या तिथे अनंगरंग रास रंगला
गोपगोपिकांसवे मुकुंद दंगला
तो पहा मृदुंग मंजिर्‍यात वाजला
हाय वाजली फिरुन तीच बासरी,
राधिके, जरा जपून जा तुझ्या घरी.
   
                     ======================
                           कृष्ण-राधा होळी गीत
                           स्वर :  लता  मंगेशकर
                           गीतकार :सुरेश  भट 
                           संगीतकार :पंडित हृदयनाथ मंगेशकर
                     =======================

                    (साभार आणि सौजन्य-संदर्भ-लैरिकसकट्टा.कॉम)           
                  --------------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-31.08.2021-मंगळवार.