II“बैल पोळा”II - कविता क्रमांक-1

[Atul Kaviraje]

                                   II"बैल पोळा"II
                                  कविता  क्रमांक-1
                               ---------------------

मित्र/मैत्रिणींनो,

     आज दिनांक-सोमवार म्हणजे, ०६.०९.२०२१, चा दिवस दोन महत्त्वाचे  विशेष असे पर्व, सण घेऊन आला आहे, ते म्हणजे, पिठोरी अमावस्या, आणि बैल पोळा. या, चला जाणून घेऊया, या दोन दिवसांचे महत्त्व, माहिती, पूजा विधी, व्रत कथा, कविता आणि बरंच काही.

                                         बैल पोळा कविता
                                         कविता  क्रमांक-1
                                       -------------------
                         
अमावस्या श्रावणाची
आली घेऊन सणाला
कृषीवल आनंदाने
सजवितो हो बैलाला..१

बैल धुवून प्रेमाने
खांदा मळणी तेलाने
मनोमन आठवतो
काम केलेले बैलाने..२

शिंगे रंगवतो धनी
गोंडे झुंबर शिंगाला
बांधे बाशिंग सुंदर
गळा घुंगराच्या माला..३

अंगावर पांघरतो
झूल सुंदर नक्षीची
तिला आरसे कवड्या
शोभा वाढविते तिची..४

बैल सजला धजला
देवा पुढं उभा केला
त्याला वाजत गाजत
घरी मिरवत नेला..५

घरा मधली गृहिणी
पूजा बैलाची करते
भाव भरल्या हृदयी
पंचारती ओवाळते..६

पान विडा कृषिवला
टिळा कपाळी लावते
घास पुरण पोळीचा
बैलामुखी भरविते..७

देवा नाही मजा येत
बैला शिवाय शेतीला
नाही मिळत सुगंध
कष्टा शिवाय मातीला..८


            कवी -पंडित  वराडे 
          --------------------

                          (साभार आणि सौजन्य-संदर्भ-स्टोरीमिरर .कॉम)
                        -------------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-06.09.2021-सोमवार.