"गौळणी-राधा-कृष्ण प्रेम-खोड्या व इतर चारोळ्या" - चारोळी-पुष्प-3

[Atul Kaviraje]

                        "गौळणी-राधा-कृष्ण प्रेम-खोड्या व इतर चारोळ्या"
                       ---------------------------------------------

मित्र/मैत्रिणींनो,

     आज ऐकुया, "गौळणी-राधा-कृष्ण प्रेम-खोड्या व इतर चारोळ्या" ,या विषया अंतर्गत चारोळी-पुष्प-3.

    लहानपणापासूनच  यमुना  ही  कृष्णाच्या साऱ्या बाल -लीलांची  साक्षीदार असते . तिच्या  तीरावर , किनाऱ्यावर  कान्हाने  खेळलेले  सारे  खेळ , ती  नेहमीच  नव्या  उत्सुकतेने  पाहत  आलेली  असते . तर  हा  खोडकर  कान्हा  पुन्हा  एकदा  तिच्या  तीरावर  एक  नवीन  खेळ  खेळण्यास  आला  आहे . त्याच्या  सवे  राधा  आणि  गोप  गोपीही  आहेत . कान्हा  खेळात  रंगला  आहे . मध्येच  खोड्या  काढून  सर्वांची  करमणूकही  तो  करीत  आहे .

    खेळता  खेळता , अचानक  राधेला  कोपरखळी  मारून , अन  चटकन  बाजूला होऊन , मी  काहीच  केले  नाही  असा  त्याचा  अविर्भाव  असतो . परंतु  राधेला  काय  साऱ्या  गोपाळ  अन  गोपिकांना  ही  त्याची  सवय  माहित  असते . बावरलेल्या  राधेला  पहाताच , सर्व  गोप  आणि  गोपिका  तिला  त्याबद्दल  विचारू  लागतात . आणि  बावरी  राधा  अजूनच  बावरी  होते.

     आणि  यमुनेच्या  तीरी  खेळ  असाच  रंगात  जातो , आणि  यमुनेसह , सारे  गोपाळ  आणि  गौळणी  , कान्हाच्या  या  कधीही  न  संपणाऱ्या  खेळात , रंगून  जाऊन  त्याच्या  बाल -लीला  कौतुकाने  पाहतात , आणि  त्याच्या  बाल -लीलांनी  हास्यात  बुडून  जातात .     

                                        चारोळी-पुष्प-3
                                      ----------------

(३)
यमुनेच्या तिरी खेळ खेळितो
खेळ खेळीत कोपरखळी मारितो
"गौळण" गोपाळ खुदकन हासुनि,
कौतुके "हरी"च्या बाळ-लीला पहातो.


-----श्री.अतुल एस.परब(अतुल कवीराजे)
-----दिनांक-21.09.2021-मंगळवार.