II स्वागत पावसाचे II-पाऊस-थेम्ब क्रमांक-15 -"आला पाऊस मातीच्या वासात "

[Atul Kaviraje]

                                     II स्वागत पावसाचे II
                                    ---------------------     

मित्र/मैत्रिणींनो,

     पाऊस अजूनही पडतो आहे. पावसाचे दिवस आहेत. ऐकुया तर पावसावरली गाणी आणि कविता. आजच्या कवितेचे ( पाऊस-थेम्ब क्रमांक-15 ), बोल आहेत- "आला  पाऊस  मातीच्या  वासात "

                                       पाऊस-थेम्ब क्रमांक-15
                                  "आला  पाऊस  मातीच्या  वासात "
                                ---------------------------------


आला  पाऊस  मातीच्या  वासात  ग  !
मोती  गुंफीत  मोकळ्या  केसांत  ग  !

आभाळात  आले  काळेनिळे  ढग
धारा  कोसळल्या  निवे  तगमग
धुंद  दरवळ  धरणीच्या  श्वासांत  ग  !
आला  पाऊस  मातीच्या  वासात  ग  !

कोसळल्या  कशा  सरीवर  सरी
थेम्ब  थेम्ब   करी  नाच  पाण्यावरी
लाल  ओहोळ  वाहती  जोसात  ग  !
आला  पाऊस  मातीच्या  वासात  ग  !

लिंबोळ्यांची  रास  कडुलिंबाखाली
वारा  दंगा  करी , जुई  शहारली
चाफा   झुरतो  फुलांच्या  भासात  ग  !
आला  पाऊस  मातीच्या  वासात  ग  !

झाडावरी  मुके  पाखरांचे  थवे
वीज  लालनिळी  कशी  नाचे  लवे   
तेजाळते  उभ्या  अवकाशात  ग  !
आला  पाऊस  मातीच्या  वासात  ग  !

वीज  कडाडता  भय  दाटे  उरी
एकली  मी  इथे  सखा  राहे  दुरी
मन  व्याकुळ  सजणाच्या  ध्यासात  ग  !
आला  पाऊस  मातीच्या  वासात  ग  !

आला  पाऊस  मातीच्या  वासात  ग  !
मोती  गुंफीत  मोकळ्या  केसांत  ग  !

                        ====================
                            गीत  : शांता   शेळके
                            संगीत  : श्रीनिवास खळे
                            स्वर  : पुष्पा  पागधरे
                            गीतप्रकार  : भावगीत , ऋतू  बरवा
                       =====================


                     (साभार आणि सौजन्य-संदर्भ-आठवणीतली-गाणी.कॉम)
                  ---------------------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-25.09.2021-शनिवार.