" नवरात्रौत्सव "- कविता क्रमांक-१

[Atul Kaviraje]

                                         " नवरात्रौत्सव "
                                         कविता क्रमांक-१     
                                      -------------------

मित्र/मैत्रिणींनो,

     आज दिनांक-०७.१०.२०२१-गुरुवार पासून नवरात्रौत्सव सुरु होत आहे. आज देवीची घटस्थापना आहे. मराठी कवितेतील माझ्या सर्व कवी-कवयित्री भाऊ-बहिणींस, नवरात्रीच्या अनेक हार्दिक शुभेच्छा. वाचूया देवी स्तुतीपर काही कविता.

रंग नवरात्रीचे----

                                         आली नवरात्री
                                       ---------------

आली नवरात्री
झाली घटाची स्थापना
करू उपासना
दुर्गेची.

नंदादीप शांत
धूप -दीपांचा दरवळ
फुलांचा परिमळ
अखंडित.

माळ रोज
नवी पाना -फुलांची
शोभा घटाची
विशेष.

सप्त धान्ये
पेरू घटाच्या मातीतून
बघती डोकावून
कोम्ब.

रुपे देवीची
दुर्गा ,काली, अंबिका
भवानी, चंडिका
कित्येक.

भरुया परडी
पीठा-मिठाचा मान
नैवेद्य छान
आवडीचा.

लेऊनि साज
घेऊनि शस्त्र हाता
सज्ज भवानीमाता
संहारा.

रंग नवरात्रीचे
उपवास, जपतप, नेमधर्म
नाना भक्तीकर्म
देविठायी.

--कवयित्री - शीला अंभुरे
  ---------------------

                    (साभार आणि सौजन्य-संदर्भ-स्टोरीमिरर.कॉम)
                  ------------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-07.10.2021-गुरुवार.