जिंदगीच्या रानामंदी.......

[SHASHIKANT SHANDILE]

जिंदगीच्या रानामंदी रोप काय लावू रे
सांग देवा पेरणीला भोग काय दावू रे

विना दान दक्षिणा तू
पावतांना दिस ना
नशिबाला पाणी नाही
जिंदगीला कस ना

सांग देवा निंदणीला कुठं तरी जाऊ रे
जिंदगीच्या रानामंदी रोप काय लावू रे

गाळून झाला घाम किती
मोल काही मिड ना
यत्नांच्या या शर्यतीत
भाग चांगले जुड ना

दर्शनाला देवा तुझ्या सांग कुठं येऊ रे
जिंदगीच्या रानामंदी रोप काय लावू रे

जीवन झालं वखरून सार
ढेकळ काही फूट ना
मुरवण्यासाठी माती
आभाळ गर्जून तूट ना

नजरेनं आशेच्या मी कुणाकड पाहू रे
जिंदगीच्या रानामंदी रोप काय लावू रे

हाती रेषा कितीक मोठ्या
एक ही ती पाव ना
देऊन कला अंगी आता
मार्गी तरी लाव ना

नशिबाला दोष कधीपर्यंत मी देऊ रे
जिंदगीच्या रानामंदी रोप काय लावू रे
सांग देवा पेरणीला भोग काय दावू रे
***********
शशिकांत शांडीले (एकांत), नागपूर
मो.९९७५९९५४५०