II श्रीमती प्रमिलाताई सेनकुडे II- "देव"

[Atul Kaviraje]

                                II श्रीमती प्रमिलाताई सेनकुडे II
                               -----------------------------

मित्र/मैत्रिणींनो,

       "श्रीमती प्रमिलाताई सेनकुडे", या आजच्या मीडिया जगतात, एक सुप्रसिद्ध ब्लॉगर आहेत. आज ऐकुया ताईंची देवावरील एक कविता. या कवितेचे शीर्षक आहे - "देव"


कविता ( देव)---
🌹🙏🌹
देव..!
------

तू 'राम' म्हण, 'अल्ला' म्हण
'येशू' म्हण, 'साई' म्हण
'देव' म्हण, 'दूत' म्हण
'अवतार' म्हण, 'काही' म्हण.

मी हरकत घेण्याचंही
कारण नाही काही..
पण माणूस म्हणून एक गोष्ट
खरंच पटत नाही !

तू हवी त्याची पूजा कर
हवी त्याची आरती गा
मॅगी, पिझ्झा, चिकन, मटन
प्रसाद म्हणून काही खा !

चोविस तास देव देव कर
वाटल्यास विसर घर
पण माझ्यासाठी दोस्ता फक्त
एवढा विचार कर !

देव म्हणजे सुपर पावर
ब्रम्हांडावर ताबा
मग त्याचं आफिस गल्लीबोळात
कशाला रे बाबा ?

ऐकलं होतं.. देव असतो
उभा सत्त्यापाठी !
तरी त्याच्या अवती भवती
दलालांची दाटी ?

चोर, डाकू, बलात्कारी
सारेच त्याचे भक्त
देव काय नुसते चेहरे
बघत बसतो फक्त ?

असा कसा चिडत नाही
त्याला नाही भान ?
वरून तुझ्यासारखे मूर्ख
तिथंच देतात दान !

देवळा भवती भिकारी
लुळे पांगळे जीव
ज्याला असेल काळीज त्याला
पाहून येते कीव !

प्रश्न त्यांचे सुटत नाहीत
दुःख सरत नाही
तरी तुझा सुपर देव
काहीच करत नाही !

म्हणून म्हणतो डोकं वापर
गहाण नको ठेऊ
भुकेल्याला, तहानल्याला
घाल कधी जेवू !

अनाथ, कोवळ्या हातामधे
पाटी-पुस्तक ठेव
आई शप्पथ तुला सांगतो
तूच होशील देव !


संकलन - *श्रीमती प्रमिलाताई सेनकुडे*
----------------------------------


               (साभार आणि सौजन्य-संदर्भ-प्रमिलासेनकुडे.ब्लॉगस्पॉट.कॉम)
             -------------------------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-22.01.2022-शनिवार.