मला आवडलेल्या चारोळ्या-चारोळी क्रमांक-14

[Atul Kaviraje]

                                     मला आवडलेल्या चारोळ्या
                                        चारोळी क्रमांक-14
                                   -------------------------

मित्र/मैत्रिणींनो,

     --खरं  आहे , जीवन  म्हणजे  अळवाच्या  पानावरील  दव -बिंदू . केव्हा  घरंगळून , ओघळून  खाली  पडेल , अन  केव्हा  जीवनाचा  देढ  गळून  पडेल , हे  काही  सांगता  येत  नाही . मनुष्याचा  जन्म -मृत्यू  त्याच्या  हाती  नाही . चौऱ्याऐंशी  लक्ष   योनी  जेव्हा  फिरते , तेव्हा  नशिबाने  मानव  जन्म  प्राप्त  होतो , असे  म्हणतात . तेव्हा  त्या  आई -वडिलांचे  आपण  आभार  मानू , त्या  परमेश्वराला  वंदन  करू , की  जे  आपल्या  या  मानव  जन्माला  पूर्णतः  कारणीभूत  आहेत . म्हणून  जन्माला  येऊन , जे  कार्य  करू  ते  चांगलंच  करू , असा  मनाशी  ठाम  निश्चय  करून  वागू . खोट्याची  संगत  कधीही  धरायची  नाही , असा  मनी  संकल्प  करू . असं  म्हणतात , या  जन्मी  केलेलं  पुण्य  फळास  येऊन  पुढील  मिळणारा  जन्मही  चांगलाच  असेल . पण  चारोळीकारास  तसं  वाटत  नाही . तो  म्हणतोय , जीवन  हे  फक्त  एकदाचं  मिळतं  . पुन्हा  पुन्हा   हाच  नरदेह  तुम्हाला  प्राप्त  होईल  याची  काय  गॅरंटी  ?

    पुढे  जाऊन  चारोळीकार  या  मतावर  ठाम  आहे , की  जसा  मानव  जन्म  पुन्हा  मिळतं  नाही , तसा  मृत्यू  कधी  झडप  घालेल  हेही  सांगता  येत  नाही . म्हणून , त्याची  सर्वांना  कळकळीची  विनंती  आहे , की  तुम्ही  हे  एकदाचं  प्राप्त  झालेले  जीवन , नीट , प्रामाणिकपणे , दुसऱ्यांची  सेवा  करीत , परोपकार  करीत  जगा . तुमच्या  मनासारखं  जगा , पण  सोबत  दुसऱ्यांच्या  मनाचाही  विचार  करा . कारण  माणुसकी,मानवता  हाच  एक  अंतिम  धर्म  आहे . त्यात  जात -पात  याना  थारा  नाही . हे  जीवन  तुम्ही  असं  जगा , जगास  उदाहरण  घालून  द्या . कारण  हा  नरदेह , हा  मानव -जन्म  पुन्हा  पुन्हा  मिळणार  नाही , अन  हे  जीवन  केव्हा  संपेल  याचीही  शाश्वती  नाही . म्हणून  मी  म्हणतोय , आजचा  दिवस  तुम्ही  छान  जगून  घ्या , उद्याच  काय  सांगून  राहिलं  ?

================
केव्हा संपेल जीवन
कुणालाच समजत नाही
मनासारखं जगून घ्यावं
कारण हा जन्म पुन्हा मिळत नाही.
================

--नव-चारोळीकार
-----------------

                        (साभार आणि सौजन्य-मराठी विचार.कॉम)
                       --------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-05.06.2022-रविवार.