चारोळी पावसाची-क्रमांक-2-पाऊस व कळी

[Atul Kaviraje]

                                         चारोळी पावसाची
                                             क्रमांक-2
                                        ----------------

मित्र/मैत्रिणींनो,

     --ती  कळी  कधीपासून  उदास  होती , खिन्न  होती , विचारात  होती , प्रसन्न  नव्हती , हसत  नव्हती , फुलतं  नव्हती , उमलतंच  नव्हती . स्वच्छंदी  वृत्तीने  बागडणाऱ्या , उडणाऱ्या  फुलपाखरास  हे  समजताच , त्याने  तिला  विचारले , हे  कळये  तू  अशी  का  बरं  आहेस , फुलतं  नाहीस , खेळतं  नाहीस , वाऱ्यासवे  हलत  नाहीस , डुलत  नाहीस , काय  बरे  याचे  कारण  ? मी  काय  केले  तर  तुझी  ही  खिन्नता , उदासीनता  दूर  होऊन  तू  पुन्हा  प्रसन्न  होशील  ? त्यावर  कळी  उत्तरली , हे  सुंदर  फुलपाखरा,  यात  कोणाचाही  दोष  नाहीय  बरं  ! मी  माझ्या  त्या  मित्राची , माझ्या  जीवनदात्याची , मला  जीवन  देणाऱ्या  देवदूताची  प्रकर्षाने  वाट  पाहात  आहे . फुलपाखराच्या  लक्षात  आले  की  तिला  खुलायला , फुलायला , उमलायला  पावसाच्या  सरींची  ओढ  लागली  आहे , आणि  त्याचीच  ती  वाट  पाहात  आहे .

     हे  कळताच  फुलपाखरू  कळीच्या  कानाशी  बिलगले , अन  म्हणाले  हे  कळये , पहा  तू  इच्छा  केलीस , अन  पश्चिम  दिशेवर  ढग  जमू  लागलेत . त्यांची  दाटी  क्षणोक्षणी  गडद  होऊ  लागली  आहे .  आणि  आता  थोड्याच  वेळात  सोसाट्याचा  गार  वारा  सुटून  ते  पाहता  पाहता  बरसूही  लागतील . आणि  मग  तुझ्या  मनातली  सारी  इच्छा  पूर्ण  होईल . हे  वृत्त  कळते  न  कळते , तोच  वर्षा -धारा  सुरु  झाल्या . पाहता  पाहता  पर्जन्य -धारांनी  साऱ्या  धरेस  भिजवीत  बागेतील  त्या  कळीसही  पूर्ण  भिजवून , तिच्या  मनातली  इच्छा  पूर्ण  केली . उत्फुल्ल  कळी  अतिशय  खुश  झाली  होती , तिचे  मन  भरून  आले  होते . पावसाचे  ती  आभार मानत  होती . आणि  मग  त्या  फ़ुलपाखराने  एक  चमत्कार  पहिला . आतापर्यंत  उदास , खिन्न , न  उमललेल्या  कळीचे  एका  सुंदर  फुलात  रूपांतर  झाले  होते . आणि  त्या  फुलपाखरास  मनोमन  पटले  की  ही  किमया , हा  बदल  , हा  फरक  घडवून  आणण्याची  ताकद  फक्त  पावसाच्या  सरींतच  आहे . बाकी  हे  कुणालाही  जमणार  नाही . खरोखरंच  हा  पाऊस  सर्वांना  आनंदी , मोहित  करून  सोडणारा  , जीवन -दान  देणारा , जीवन  बदलणारा  एक  देव -दूतच  आहे .

      पाऊस  व  कळी
    -----------------
आगमन  पावसाचे  झाले
वृत्त  कळीच्या  कानी  गेले
मग  कळीची  कळी  खुलून,
तिचे  सुंदर  फुल  झाले.
==============


-----श्री.अतुल एस.परब(अतुल कवीराजे)
-----दिनांक-13.06.2022-सोमवार.