मला आवडलेल्या चारोळ्या-चारोळी क्रमांक-21

[Atul Kaviraje]

                                   मला आवडलेल्या चारोळ्या
                                      चारोळी क्रमांक-21
                                 -------------------------

मित्र/मैत्रिणींनो,

     --मागील  चारोळीतून  म्हटल्याप्रमाणे  हा  चारोळीकार  आईची  ममता , माया  , प्रेम , महानता  याबद्दल  विशेषणांनी  भरलेली  उदाहरणे  देत आहे , दाखला  देत  आहे . आई  ही  आई  असते , तिला  कुणाचीही  उपमा  देता  येत  नाही . आई  म्हणजे  परमेश्वर , आई  म्हणजे  ईश्वर , आई  म्हणजे  आपली  जन्मदात्री , आपल्याला  जीवन  देणारी , आपला  सांभाळ  करणारी , आपली  काळजी  वाहणारी , माया , ममता , प्रेम  देणारी . ती  जितकी  प्रेमळ  दिसते , पण  तितकीच  ती  कठीण  काळात  कणखरही  होऊ  शकते , याचा  अनुभव  चारोळीकाराने  घेतलेला  आहे . दुर्धर ,दुर्गम, कठोर , कठीण  परिस्थितीत   तिने  आपल्या  मनाचा  कणखरपणा  दाखवून , कित्येक  संकटाना  सहज  तोंड  कसं  दिलय , हे  प्रत्यक्ष  त्याने  पाहिलंय . प्रसंगी  ती  अहिल्याबाई  होळकर , झाशीची  राणी , जिजामाता  होऊ  शकते , हे  तिने  दाखवून  दिले  आहे .

     आणि  अशी  ही  आई  आपल्या  लहानपणापासून  अगदी  मोठे  होईपर्यंत  सतत  आपल्या  पाठीशी  असते , आपले  रक्षण  करीत  असते .कितीही  मोठा  झाला  तरी  आईला  आपले  मूल  हे  बालकासमानच  असते . आपल्या  मायेची  पाखर , ती  सतत  आपल्यावर  पखरत  असते . एक  क्षणही  ती  आपल्या  मुलांना  आपल्यापासून  दूर  ठेवीत  नाही . प्रत्येक  संकटात  ती  त्याच्यावर  ममतेची  सावली  धरून  असते . त्याला  उन्हाचे  चटके  बसू  लागताच , झळ  पोचताच , तिच्या  लक्षात  येता , स्वतः  उन्हात  राहून  आपल्या  मुलांवर  गार , थंड , शीत  छायेचा  शिडकावा  करीत  असते , गारवा  देणारी  सावलीच  जणू ती  असते . अश्या  या  आईचा  त्याग , तिचे  मुलांप्रती  प्रेम , त्यांचे  सुख  जपण्यास  ती  नेहमीच  प्रयत्नशील  असते . तर  अशी  ही  आई , प्रत्येकास  मिळावी . तिच्या  मायेचे  छत्र  प्रत्येकावर  असावे .

===============
आई जितकी प्रेमळ असते
आणि तितकीच कणखर दिसते
भर उन्हात ती आपल्याला
गारवा देणारी सावली असते.
===============

--नव-चारोळीकार
----------------

                         (साभार आणि सौजन्य-मराठी नेतृत्व.कॉम)
                        -------------------------------------


-----संकलन
-----श्री.अतुल एस.परब(अतुल कवीराजे)
-----दिनांक-14.06.2022-मंगळवार.