चारोळी पावसाची-क्रमांक-4-पावसाचे महत्त्व

[Atul Kaviraje]

                                        चारोळी पावसाची
                                            क्रमांक-4
                                       ----------------

मित्र/मैत्रिणींनो,

     --पाऊस  मला  आवडतो , खूप  आवडतो , तो  आला  की  माझी  कळी  खुलते , मन  प्रसन्न  होते , ते  पावसाचे  थेम्ब , त्या  पावसाच्या  सरी , अंगावर  घेऊन  मला  एक  न  भूतो-न  भविष्यती  असा  एक  दैवी  आनंद  प्राप्त  होतो . माझ्या  मनाला  एक  सुखद  अनुभूती  येते , आजवर , आतापर्यंत झालेल्या  तप्त  मनास  शीतल  गारवा  मिळतो , सुखद  थंडावा  मिळतो . आणि  मन  एका  वेगळ्याच  दुनियेत  रममाण  होते . पावसाची  ही  किमया , फक्त  त्यालाच  साधते , बाकी  कोणासही  याची  सर  येणे  नाही .

     तर  अश्या  या  माझ्या  आवडत्या  पावसास , मी  एकदा  विचारले , तू  येतोस , मला  भिजवून  टाकतोस , मनाला  चिंब  करतोस , साऱ्या  धरेस  सुखद , शीतल  गारवा  देतोस , एक  आगळी  अनुभूती  देतोस . मला  तू  रोज  हवा  आहेस . मला  तू  नित्य  माझ्याजवळ  हवा  आहेस . तू  रोज  पड , मला  येऊन  रोज  भेट . माझ्या  डोळ्यांचे  पारणे  फेड . माझी  तुला  रोजच  पाहण्याची  इच्छा  आहे . तुझ्याशिवाय  माझे  तर  पानही  हलत  नाही . रोज  येशील  का  मला  भेटायला  ? तुझा हा  शीत , थंड , शिरशिरी  आणणारा सुखद  शिडकावा  रोज  पखरशील  का ? एक  अनन्य  अनुभूती  तू  रोज  मला  देशील  का  ? तुझ्या  सहस्त्र -धारांनी  मला  कुरवाळशील  का  ? तू  रोजच  पडशील  का  ?

     त्यावर  पाऊस  उत्तरला , अरे  वेड्या , रोज  रोज  पडणे ,येणे  माझ्या  हातात  असतं  तर  तुझ्यासाठी  मी  तेही  केलं  असतं . पण  ते  माझ्या  हातात  नाही . ते  फक्त  या  निसर्गाच्याच  हाती  आहे . तोच  तर  आम्हा  सर्व  ऋतूंचा , माता -पिता  आहे . अरे  त्यानेच   तर  हे  चक्र  नेमून  दिले  आहे , उन्हाळा , हिवाळा  अन  पावसाळ्याचे . तुम्हा  मानवाना , नियमित  हे  आमचे  प्रत्येकी  ३  ऋतू  ४ महिने  मिळावयासच  हवेत . कारण  त्यांची  तुम्हाला  फार  गरज  आहे . हो  आणि  जर  सतत  तू  माझ्या  पडण्याची  मागणी  केलीस , तर  बाकीच्या  म्हणजे  उन्हाळा , हिवाळा  या  ऋतूंचे  महत्त्व  तुला  कसे  काय  कळणार  ? आणि  पर्यायाने  माझेही  येणे , माझेही  पडणे  हे  या  निसर्गाच्याच  हाती  आहे . माझेही  महत्त्व  तुला  कळावयास  हवे , यासाठीच  तर  निसर्गाने  ही  ऋतूंची  परिक्रमा  योजिली  आहे . सर्व  ऋतूंचे  त्या  त्या  काळात  असणे , ही  निसर्ग -नियमाची  गरज  आहे . आणि  याचे  महत्त्व  तू  जाणून  घे . तेव्हा  हा  हट्ट  सोड , आणि  माझ्यासह  इतरही  ऋतूंचे  स्वागत  करण्याची  तयारी  ठेव .


         पावसाचे  महत्त्व
       -----------------

पावसाला  मी  एकदा  विचारलं
रोज  मला  भेटायला  येशील ?
पाऊस  हसून  मला  म्हणाला,
मग  माझे  महत्त्व  ते  काय  राहील !
==================


-----श्री.अतुल एस.परब(अतुल कवीराजे)
-----दिनांक-17.06.2022-शुक्रवार.