चारोळी पावसाची-क्रमांक-27-रडणारा पाऊस ?

[Atul Kaviraje]

                                       चारोळी पावसाची
                                          क्रमांक-27
                                      ----------------

मित्र/मैत्रिणींनो,

      --प्रस्तुत  चारोळीतून , चारोळीकारास  नेहमीच  एक  प्रश्न , आणि  त्या  प्रश्नाचे  न  उकललेले  उत्तर , त्याला  नेहमीच  सतावत  राहते , असे  दर्शविण्यात  आले  आहे . हे  न  सुटलेले  कोडे  आजवरही  तसेच  आहे . या  प्रश्नाचे  उत्तर  शोधण्याचा  तो  दर -वर्षी  प्रयत्न  करतो , पण  त्याला  त्यात  काही  यश  येत  नाही . पावसाची  सुरुवात झाल्यावर  तो  पडणे , थांबून  पडणे  इथवर  तर  ठीक  आहे . ते  तर  नैसर्गिक झाले . पडणे  हा  त्याचा  निसर्ग -नियमाचा  एक  भाग  बनून  राहिला  आहे. आणि  तो  त्याप्रमाणे  दरवर्षी , दरसाली  येऊन  पडणारच .

     या  चारोळीकारास  न  सुटलेले  कोडे , असे  की  जेव्हा  पाऊस   निसर्ग -नियमांच्या  विरुद्ध  जाऊन  पडतो , ढग -फुटीने  बरसतो , धो  धो  कोसळतो , सर्व  सर्व  काही  वाहून  नेतो , अक्षरशः  जग -बुडी  आणतो , तेव्हा  त्याला  वारंवार  असं  वाटत  की , या  पावसाचे  काही  बिनसले  आहे . तो  नेहमीप्रमाणे  पडत  नाहीय , त्याचे  काही  तरी  हरवले  आहे , त्याचे  कुणी  काही  हिरावून  नेले  आहे , तो  क्रुद्ध  होऊन  बरसतोय  , तो  रुद्र  होतोय , तो  तांडव  करतोय . तो  इतका  तीव्रतेने  कोसळतोय , की  जणू  कोणासाठी  तरी  तो  रडतोय , कोणाच्यातरी  आठवणीने  रडतोय , त्याचा  कंठ  दाटून  येतोय , आणि  तो  सतत  कोसळतोय .

     हा  नवं -चारोळीकार  पुढे  मिश्किलीने  म्हणतो , की  हा  पाऊस  तर  देव  आहे , आणि  आम्ही  मर्त्य -मानव . आम्हाला  सर्व  भाव -भावना , जाणीवा  आहेत . कुणी  हरवले , कुणी  सोडून  गेले , मना -विरुद्ध  झाले  आणि  इतर  बऱ्याच  विपरीत  घटना  घडल्या  की  आम्हा  मानवांना  रडू  कोसळते . आमच्या  हातात  तेव्हा  रडण्याशिवाय  दुजा  कोणताही  मार्ग  नसतो . कारण  आम्ही  एक  सामान्य  माणूस  आहोत , मानव  आहोत . पण  हा  सर्व -शक्तिमान  पाऊस  तर  बलाढ्य  असूनही  इतका  हतबल  का  होतोय  बरे  ? तो  आपल्या  संतत -धारेतून  कुणासाठी  गळा  काढीत  आहे  ? काय  याचे  कारण  की  तो  आपले  रडू  थांबवित  नाहीय  ? म्हणून  हे  पावसा , आम्हा  मानवाचे  तुजपाशी  एकचं  मागणे  आहे , की  हे  कोसळणे  , कोसळताना  रडणे  तुला  शोभा  देत  नाही , तू  महाशक्तिमान , बलाढ्य  आहेस  , तू  तसाच  राहा , तू  फक्त  पड  आणि  आम्हा  जल -संजीवनी  दे .

     रडणारा पाऊस ?
    ----------------
कोसळणारा पाऊस पाहून,
मला नेहमीच एक प्रश्न पडतो,
माझे तर ठीक आहे,
पण हा कोणासाठी रडतो......
===============

--नव-चारोळीकार
----------------

                 (साभार आणि सौजन्य-संदर्भ-मन माझे.ब्लॉगस्पॉट.कॉम)
                -------------------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-01.08.2022-सोमवार.