उत्तम मराठी कविता-कविता क्रमांक-१-सावळबाधा

[Atul Kaviraje]

                                     उत्तम मराठी कविता
                                      कविता क्रमांक-१
                                    -------------------

मित्र/मैत्रिणींनो,

      "उत्तम मराठी कविता", या कविता सदर-अंतर्गत आज ऐकुया, एक उत्तम मराठी कविता. या कवितेचे नाव  "सावळबाधा", असून ती "पूजा भडंगे" या कवयित्रीने लिहिली आहे.

                                         "सावळबाधा"
                                        -------------

अलवार वाजवित वेणू
तो स्वप्नफुलांवर आला
अन रंग सावळा माझ्या
डोळ्यांवर सोडून गेला

क्षितिजावर निळसर रेघा
गोंदून जराश्या हलक्या
सांजेचे लेऊन पंख
तो कृष्ण किनारी आला

मी तिथेच होते तेंव्हा
थांबले मंदिरापाशी
तो सोनखुणांचे पाऊल
वाळूवर उमटत आला

भरजरी शुभ्र वस्त्रांवर
नाजूक कशिदा त्याच्या
हातात कडे सोन्याचे
मनमोहन लेऊन आला

बैसला जरा बाजूला
मंदिरी पायरीपाशी
डोळ्यात पाहुनी माझ्या
डोळ्यात हरवुनी गेला

हातात घेऊन हात
मज म्हणे, सखे जाऊया
मी लाजून हसता गाली
गालांवर उमटत गेला

मज झाली सावळबाधा
मी झाले ना रे राधा ?
तो ऋतू जीवघेणा पण,
स्पर्शात शहारून गेला

ती शामनिळाई ल्याली
वेगळीच होती सांज
तो कातरवेळी ऐसा
मोरपीस फिरवून गेला

मी ओढून घ्यावा म्हणुनी
जाताना माझ्यासाठी
कालिंदीच्या काठावर
तो शेला विसरून गेला

कवयित्री~पूजा भडंगे
------------------

                       (साभार आणि सौजन्य-उत्तम मराठी कविता)
                                   (संदर्भ-फेसबुक.कॉम)
                      ---------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-10.08.2022-बुधवार.