सुरेश भटांची गझल-गझल-क्रमांक-8-रिक्त

[Atul Kaviraje]

                                      सुरेश भटांची गझल
                                     ------------------
मित्र/मैत्रिणींनो,

      गज़ल - सम्राट श्री सुरेश भट हे गझलकार म्हणून ओळखले जातात. बऱ्याचश्या अप्रतिम, अर्थपूर्ण गझला त्यांनी लिहिल्या आहेत. "गझल" या विषया-अंतर्गत ऐकुया भटांची एक गझल. गझलीचे बोल आहेत- "रिक्त"

                                   गझल-क्रमांक-8
                                       "रिक्त"
                                  ----------------

उगिच बोलायचे, उगिच हासायचे
उगिच कैसेतरी दिवस काढायचे

मधुन जमवायचे तेच ते चेहरे
मधुन वाऱ्यावरी घरच उधळायचे

चुकुन अपुली कधी हाक ऐकायची
मन पुन्हा बावरे धरुन बांधायचे

रडत राखायची लोचने कोरडी
सतत कोठेतरी भिजत धुमसायचे

उगिच शोधायचे भास विजनातले
अटळ आयुष्य हे टळत टाळायचे

ह्या इथे ही तृषा कधि न भागायची
मीच पेल्यातुनी रिक्त सांडायचे!

                         (साभार आणि सौजन्य-श्री सुरेश भट)
                                 (संदर्भ-सुरेशभट.इन)
                         --------------------------------

-----संकलन
-----श्री.अतुल एस.परब(अतुल कवीराजे)
-----दिनांक-10.08.2022-बुधवार.