जुनी मराठी गोड गाणी-एका तळ्यांत होती बदकें पिलें सुरेख

[Atul Kaviraje]

                                   "जुनी मराठी गोड गाणी"
                                   ---------------------

मित्र/मैत्रिणींनो,

     जुनी मराठी गोड गाणी, या विषया-संदर्भात, आज ऐकुया एक जुने मराठी गाजलेले गाणे. 

                            "एका तळ्यांत होती बदकें पिलें सुरेख"
                           ----------------------------------

एका तळ्यांत होती बदकें पिलें सुरेख
होते कुरूप वेडे पिल्लू तयांत एक ।।

कोणी न तयास घेई खेळावयास संगे
सर्वांहुनी निराळे ते वेगळे तरंगे ।।

दावूनि बोट त्याला म्हणती हसून लोक
आहे कुरूप वेडे पिल्लू तयांत एक ।।

पिल्लास दु:ख भारी, भोळे रडे स्वतःशी
भावंड ना विचारी सांगेल ते कुणाशी ।।

जे ते तयास टोची दावी उगाच धाक
होते कुरूप वेडे पिल्लू तयांत एक ।।

एके दिनीं परंतु पिल्लास त्या कळाले
भय वेड पार त्याचे वार्‍यासवे पळाले ।।

पाण्यात पाहतांना चोरूनिया क्षणैक
त्याचेच त्या कळले तो राजहंस एक ।।

--कवी : ग. दि. माडगूळकर
--------------------------

                    (साभार आणि सौजन्य-संदर्भ-मराठी प्लॅनेट.कॉ.इन)
                   ---------------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-13.08.2022-शनिवार.