मला आवडलेल्या चारोळ्या-चारोळी क्रमांक-52

[Atul Kaviraje]

                                  मला आवडलेल्या चारोळ्या
                                     चारोळी क्रमांक-52
                                 ------------------------

मित्र/मैत्रिणींनो,

      नवं-चारोळीकाराच्या या  चारोळीतून  हा  प्रेमी  काही  आगळे -वेगळे , अफलातून  असं  मागणं  आपल्या  प्रेयसीसाठी  मागत  आहे . त्याचे  त्याच्या  प्रियेवर  अतिशय  प्रेम  आहे . दिवसा  काय  तो  रात्रीही  तिचेच  ध्यान  करीत  असतो . दिवसा  त्यांचे  प्रिया -राधन  चालतेच , पण  वेगळे  झाल्यावर  त्याची  रात्रही  तिच्या  विचारांनी , स्वप्नांनी  रंगून  जाते . स्वप्नात  पूर्ण  रात्रभर  तो   तिच्याच  सहवासात  असतो , तिच्या  सान्निध्यात  असतो . असे  त्यांचे  प्रेम  रात्रंदिवस  रंगत असते .

     या  चारोळीकाराच्या  प्रस्तुत  चारोळीतील  नायक , प्रेमी  म्हणतोय , की  प्रिये  दिवस  तर  तुझ्याबरोबर  माझा  मजेत  जातो , पण  ही  रात्र  मात्र  मला  खायला  उठते . तुझ्या  आठवणीत  मग  मी  माझं  मन   रमवतो . डोळ्यावरची  निज  तर  कोसो  दूर  पळालेली  असते . तेव्हा  घराच्या  छतावर , गच्चीवर  मन  रिझविण्यास  जातो . तेथे  थोडी  वामकुक्षी  घेतो . घेता  घेता  आभाळाकडे  टक  लावून  पाहतो . असंख्य , अगणित  चांदण्यांनी  भरलेले  हे  आसमंत  मला  खुणावत  राहते . मग  त्या  चमकणाऱ्या  चांदण्या  मोजण्यात   मी  रममाण  होतो .

     आता  या  चांदण्या  मला  जवळच्या  वाटू  लागतात . नकळत  मी  त्यांना  मोजू  लागतो . तुझी  छबी  त्या  प्रत्येक  चांदणीत  मी  पाहू  लागतो . पण  या  इतक्या  असंख्य  आहेत , की  माझे  मोजता  मोजता  गणित  कुठेतरी  चुकते , मग  पुन्हा  पहिल्यापासून  मला  सुरुवात  करावी  लागते . त्यानंतर  मी  तोही  नाद  सोडून  देतो . अचानक  एक  निखळता  तारा  माझ्या  दृष्टीस  पडतो . अत्यंत  वेगाने  धरित्रीच्या  क्षितिजावर  तो  विलुप्त  होतो . आभाळाच्या  मोह -पाशातून  अलग  होता  होता , तो  पाठीमागे  प्रकाश  ठेवून  जातो . त्याचे  जीवन  येथेच  संपुष्ठात  येते . कुणीतरी  म्हटलंय , की  निखळता  तारा  नजरेस   पडता , काही  मागणे  मागितले  तर  ते  पूर्ण  होते . आणि  मग  ही  श्रुंखला  साऱ्या  रात्रभर  सुरु  होते, राहते  . प्रत्येक  निखळणाऱ्या  ताऱ्याकडे  मी  तुझीच  मागणी  करतो . आयुष्यभर  मला  तुझीच  साथ  हवी , तूच  मला  हवीस , तुझे  माझ्यावरच  प्रेम  असावे , अशी  मी  त्या  ताऱ्याकडे  मागणी  करतो . मला  ठाऊक  आहे  की  ही  एक  वेडसर  कल्पना  आहे , विचार  आहे . पण  आता  माझ्या  साथीस  तू  नाहीस , तर  या  चांदण्या  आणि  हे  निखळते  तारे  तर  आहेत , यातच  काय  ते  समाधान !

===============
काल रात्री आकाशात
चांदण्या मोजत होतो,
निखळणा-या प्रत्येक
ता-याजवळ तुलाच मागत होतो.
===============

--नवं-चारोळीकार
----------------

                   (साभार आणि सौजन्य-संदर्भ-ऑल इन मराठी.कॉम)
                  ----------------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-16.08.2022-मंगळवार.