चारोळी पावसाची-क्रमांक-35-तृषार्त चातकाची प्रेम-थेम्ब प्रतीक्षा

[Atul Kaviraje]

                                     चारोळी पावसाची
                                        क्रमांक-35
                                    -----------------

मित्र/मैत्रिणींनो,

     --नवं-चारोळीकाराच्या  या  प्रस्तुत  चारोळीतील  प्रियकरास  अजूनही  तो  पाऊस  आठवतोय , ज्या  दिवशी  त्याच्या  प्रियेची  आणि  त्याची  भेट  त्या  विशिष्ट  जागी  झाली  होती . त्याला  अजूनही  आठवतेय  ते  इंद्र -धनुष्य  जे  त्या  दोघांच्याही  प्रेमाचे  साक्षीदार  होते . अजूनही  बऱ्याच  गोष्टी  त्याच्या आठवणीत  गुंफून  राहिल्यात , ज्या  त्याला  आजही  विसरता  येणं  केवळ  अशक्यप्राय  आहेत . हा  प्रेमी  म्हणतोय , की  हे  प्रिये , माझा  तेव्हा  तुझ्याशिवाय  दिवस  जात  नव्हता , व  रात्र  तर  रात्रभर  जागीच  असायची . केव्हातरी  चुकून  डोळा  लागलाच  तर  स्वप्न  फक्त  तुझेच  पडायचे . आणि  मग  त्या  स्वप्नात  गुरफटू  पाहता , दिवस  केव्हा  उजाडायचा  ते  मला  समजायचेच  नाही .

     वरील  वक्तव्यावरून  वाचकांना  समजलेच  असेल , की  हे  सारे  तेव्हा , केव्हातरी  घडले  होते , घडून  गेले  होते . हे  विरह  गाणं , ही  विरह  चारोळी  असे  सूचित  करतेय  की  एकमेकांपासून  दूर  जाण्याची  प्रक्रिया  तेव्हा  केव्हातरी  घडून  आली  होती . काही  कारणास्तव  दोघांचे  हे  प्रेम  एकत्र  राहू  शकले   नव्हते . त्या  दोघांनाही  विरह  सहन  करावा  लागला  होता , आणि  आजही  हा  विरह  तसाच  होता  . त्या  दोघांची  त्या-नंतर  कधीही  भेट  होऊ  शकली  नाही . दोघे  एकमेकांना  मुकले  ते  कायमचेच . आता  फक्त  आठवणीच  उरल्या  होत्या . त्यावरच  या  प्रेमीचे  आजचे  आणि  यापुढील  जीवन  अवलंबून  होते . नव्हे  तर  तो  या  आठवणींवरच  जगत  होता .

     हा  प्रेमी  आठवत  असं  म्हणतोय , की  हे  प्रिये , आपली  पावसातली  ती  भेट  अजूनही  मला  स्मरतेय . त्यावेळी  तो  पाऊस  जेव्हा  कोसळायचा , तसा  आजही  कोसळतोय . फरक  इतकाच  की  तेव्हा  मी  तुझ्यासोबत  होतो , आणि  आता  तो  फक्त  आठवणींतच  उरलाय . आजही  माझे  मन  तुझ्यापाशी , तुझ्या  घरापाशी  रेंगाळतेय , त्या  पडणाऱ्या  पावसाच्या  रूपाने . तो  बरसणारा  पाऊस  याचा  साक्षीदार  आहे . तुझ्या  प्रेमाच्या  एका  थेंबासाठी , तुझी  प्रेमळ  नजर  पडण्यासाठी , मी  आणि  माझा  मनःरुपी  चातक  पक्षी  केव्हाचा  तरसतोय . मला  महिताहे , की  आता  याचा  काहीही  उपयोग  नाही , आता  फार  उशीर  झाला आहे . पण  आशा  अजूनही  बाकी  आहे .  आजही  ती  अधुरी  आस    घेऊन  मी  फक्त  तुझ्या  त्या  दर्शनाची , तुझ्या  त्या  असण्याची  चातक  पक्ष्याप्रमाणे  वाट  पाहत  आहे . तो  तुझ्या  घराभोवती  कोसळणारा,  पडणारा  पाऊस  मला  हवा  आहे . मला  फक्त  एकवारच  दर्शन  दे , आणि  माझ्यातील  या  चातक -पक्ष्याला  फक्त  तुझा  प्रेम -थेम्ब  पाजून  तृषार्त  कर .

तृषार्त चातकाची प्रेम-थेम्ब प्रतीक्षा
----------------------------
आठवणीतला पाऊस नेमका,
तुझ्या घरापाशी बरसतो,
माझा वेडा चातक पक्षी इथे,
एका थेंबासाठी तरसतो.
=============

--नवं -चारोळीकार
-----------------

                (साभार आणि सौजन्य-संदर्भ-मन माझे.ब्लॉगस्पॉट.कॉम)
                ------------------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-17.08.2022-बुधवार.