मला आवडलेल्या चारोळ्या-चारोळी क्रमांक-64

[Atul Kaviraje]

                                 मला आवडलेल्या चारोळ्या
                                    चारोळी क्रमांक-64
                                -----------------------

मित्र/मैत्रिणींनो,

     --या  चारोळीतून  ही  कवयित्री  आपल्या  प्रियकराची , आपल्या  प्रेमाची  परीक्षा  तर  घेत  नसावी ? त्याला  पारखून  तर  घेत  नसावी , की  त्याचे  माझ्यावर  खरोखरच  प्रेम  आहे , की  नुसता  बोलाचाच  भात  आणि  बोलाचीच  कढी . मग  या  चारोळीतून ती  त्याला  अनेक  प्रश्न  विचारून  अक्षरशः  भंडावून  सोडत  आहे . तिला  पाहायचंय  की  तो  आपल्या  प्रश्नाची  काय  उत्तरे  देईल ? आपल्या  या  परीक्षेत  तो  उत्तीर्ण  होईल  का ?

     या  चारोळीत  ती  त्याला  पुढे  विचारतेय  की , मी  मनाने  तुझी  केव्हाच  झाली  आहे , पण  मुद्दामून  तुझ्यापासून  दूर  राहिले , तुला  टाळत  राहिले , तुझ्याबरोबर  अबोला  धरला , तर  तो  तुला  चालेल  का  ? तुला  हे  माझं  वागणं  खपेल  का  ? तुझ्याकडे  दुर्लक्ष  केलेलं  तुला  रुचेल  का ?  माझं  तुझ्यावर  खूप  प्रेम  आहे , अगदी  निःसंशय .  मी  जर  ते  व्यक्त  नाही  केले , तुझ्याशी  अबोला  धरत  राहिले , माझं  तुझ्यावर  प्रेमच  नाही  असं  भासवत  राहिले , तर  तू  काय  करशील  ? हे   माझं  वागणं  तुला  खपेल  का  ? तुला  आवडेल  का  ?

     पुढे  ही  कवयित्री  चंद्राची  उपमा  देऊन  त्याला  म्हणजे  आपल्या  प्रियकराला  विचारीत  आहे , मी  मुद्दामून  तुझ्या  दृष्टीआड  झालेली  तुला  चालेल  का ? समजा  तो  चंद्र  त्या  ढगांआड  लपला आणि  त्याला  शोधणाऱ्या  चांदण्यांची  मजा  पाहत  राहिला , तर  ते  बिचाऱ्या  चांदण्यानाही  बहुधा  नाही  चालणार ! त्यांचा  जीव  चंद्राविना  कासावीस  होणार . त्या  त्याचे  दर्शन  घेण्यास  उतावळ्या  होणार . चंद्र  असा  दडी  मारून  चूक  तर  करीत  नाही  ना  ? त्याप्रमाणेच  तुझे  होणार  का  ? मी  दिसली  नाही , किंवा  माझे  दर्शन  नाही  झाले  तर  तू  असाच  उतावीळ  होणार  आहेस  का  ? कासावीस  होणार  का  ? माझं  हे  वरीलप्रमाणे  वागणं  तुला  खरंच  झेपेल  का  ? माझ्याशिवाय  तू  राहू  शकशील  का  ?

     आणि  या  चारोळीचा  शेवट  करताना  ही  कवयित्री  त्याला  विचारतेय  की , माझी  तुला  कधी  आठवण  येईल  का  ? माझ्या  आठवणींनी  तुझी  तगमग , तळमळ  होईल  का  ? आठवणीने  तुझा  कंठ  दाटून  आला , तू  सद्गतीत  झालास  तर , तू  तुझं  मन  कुठे  रमवशील ? तुझं  मन  खरोखरचं  रमेल  का  ? की  माझ्यावाचून  तुला  जीवन  हे  रुक्ष , भयाण , वाळवंटासमान  भासू  लागेल  ? या  जीवनात  काहीच  अर्थ  नाही , असं  तुला  वाटू  लागेल  का  ? आणि  शेवटी  ती  प्रेमाने , लाडाने  त्याला  म्हणतेय , की  अरे  मी  तुझी  परीक्षा  घेत  होते , मी  असं  कधीही  वागणार  नाही . तुला  कधीही  मी  दूर  लोटणार  नाही . मी  तुझ्यावर  असंच  अगदी  शेवटपर्यंत  प्रेम  करीन .

================
माझं असं वागणं
तुला खरंच झेपेल का.?
ढगाआड चंद्र लाजून
लपला चालेल का?
जवळच असूनही तुझ्यापासून
दूर राहीले तर खपेल का. ?
इतकं प्रेम करूनही
व्यक्त झाले नाही तर
मनाला तूझ्या रूचेल का..?
आठवणींनी कंठ दाटून आला तर
तुझं मन कुठे रमेल का..?
================

--प्राजू
-------

                    (साभार आणि सौजन्य-संदर्भ-महाराष्ट्रीयन.इन)
                    ---------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-09.09.2022-शुक्रवार.