मला आवडलेल्या चारोळ्या-चारोळी क्रमांक-65

[Atul Kaviraje]

                                मला आवडलेल्या चारोळ्या
                                   चारोळी क्रमांक-65
                               -----------------------

मित्र/मैत्रिणींनो,

     --नवं-चारोळीकाराच्या  या  विरह-चारोळीतून  पुन्हा  एकदा  दोन  प्रेमी  जीवांच्या  ताटातुटीचे  असे  हृदय-द्रावक  वर्णन  केल्याचे  दिसून  येते . दोघांची  काही  कारणास्तव  ताटातूट  झाली , आणि  तो  विरह  आजपर्यंत  त्या  दोघांनाही  भोगावा  लागतोय , सहन  करावा  लागतोय . त्या  प्रेमाची  आज  पुन्हा  प्रकर्षाने  त्याला  किंवा  तिला  आठवण  आली  आहे . ते  दिवस  त्यांना  आठवताहेत . प्रेम  झाल्याचे , प्रेम  फुलल्याचे , प्रेमाच्या  आणाभाका  घेतल्याचे , पुढे  प्रेम-भंग  झाल्याचे , प्रेमात  ताटातूट  झाल्याचे , विरह  आल्याचे  असे  चित्र  दोघांच्याही डोळ्यांसमोरून  झर्रकन  निघून  जातंय .

     नवं-चारोळीकाराच्या  चारोळीतील  या  प्रेमीस  किंवा  प्रेमिकेस  आज  अवचित  एकमेकांची  आठवण  झाली  आहे . आणि  पुन्हा  एकदा  ती  हुरहूर , ती  धडधड , ती  ओढ , ते  आकर्षण  या   संमिश्र  भावना  त्या  दोघांनाही  जाणवू  लागल्या  आहेत . त्यांच्या  हृदयातील  प्रेमाची  ती  तळमळ , ती  कळकळ  त्यांना  पुन्हा  जाणवू  लागली आहे . आणि  पुन्हा  एकदा  त्यांना  त्या  दिवसांच्या  आठवणी  डोळ्यांपुढे  तरळू  लागल्यात . असं  वाटतंय  की  हे  कालच  घडलं  होतं . ते  सत्य  होतं  की  स्वप्न , असा  आभास  दोघांनाही  होतं  आहे . सत्य  असेल  तर  ठीकच , पण  स्वप्न  असेल  तर  ते  कधीच  संपू  नये .

     त्या  आठवणी  त्या  दोघांच्याही  सभोवती  फेर  धरून  नाचू  लागल्यात . काही  केल्या  त्यांचे  मन  स्थिर  होईना , ते  सतत  त्याच  त्याच  आठवणी  काढू  लागत , त्यात  गुंगून , गुंतून  राहू  पहात  होतं . पण  शेवटी  दोघांनाही  ही  जाणीव  होती , की  आता  या  गोष्टींचा  काहीही  उपयोग  नाहीय . जे  व्हायचे  ते  केव्हाच  घडून  गेलंय . आता  त्या  गोष्टी  उगाळून  आपल्यालाच  दुःख  होणार . आणि मग  मनाची  पुन्हा  एकदा  तगमग  सुरु  होणार . घालमेल  सुरु  होणार . त्यापेक्षा  त्या  आठवणी  नकोच . मनाची  अशी  समजूत  घालून , डोळ्यांतले  पाणी  तसेच  डोळ्यांत  ठेवून , मग  ती  दोघेही  कायमचाच  एकमेकांना  विसरण्याचा  खोटा  प्रयत्न  करू  लागली . नवं  चारोळीकारांची  ही  विरह-चारोळी  क्षणभर  मनाला  वेदना  देऊन  जाते , मन  सुन्न  करून  जाते .

==============
प्रेमाच्या या प्रेमळ हृदयात
आज अचानक धडधड झाली
डोळे भरले पाण्यानी आणि,
पुन्हा तुझी आठवण आली...
==============

--नवं-चारोळीकार
----------------

                       (साभार आणि सौजन्य-मराठी नेतृत्व.कॉम)
                      -------------------------------------

-----संकलन
-----श्री.अतुल एस.परब(अतुल कवीराजे)
-----दिनांक-11.09.2022-रविवार.